علیحدگی پسند لیڈر یاسین ملک پر لگا پی ایس اے، دو سال تک رکھا جا سکتا ہے حراست میں

جموں و کشمیر لبریشن فرنٹ کے چیئرمین محمد یاسین ملک کو پبلک سیفٹی ایکٹ کے تحت گرفتار کیا گیا ہے۔ یہ اطلاع لبریشن فرنٹ کے ایک ترجمان نے دی۔ انہوں نے بتایا 'ملک پر غیرقانونی قانون پی ایس اے عائد کیا گیا ہے۔ انہیں سری نگر سے کوٹ بلوال جیل جموں منتقل کیا جارہا ہے'۔ غور طلب ہے کہ ریاستی پولیس نے علیحدگی پسند لیڈر یاسین ملک کو گذشتہ ماہ (فروری) کی 22 تاریخ کو حراست میں لیا تھا۔ جموں و کشمیر میں ماحول خراب کرنے کے الزام میں یاسین ملک کے خلاف  کوٹھی باغ پولیس اسٹیشن میں معاملہ درج کیا گیا تھا۔ فرنٹ ترجمان کے مطابق ملک کو جمعرات کی صبح بتایا گیا کہ ان پر پی ایس اے عائد کیا گیا ہے اور انہیں کوٹ بلوال جیل جموں منتقل کیا جائے گا۔