پاکستان کے سابق وزیر اعظم نواز شریف کو العزیزیہ ریفرنس میں سات سال کی سزا ، فلیگ شپ کیس میں بری

پاکستان کے سابق وزیر اعظم نواز شریف کو العزیزیہ ملز کیس میں سات سال قید کی سزا سنائی گئی ہے ۔ تاہم انہیں ایک دوسرے معاملہ فلیگ شپ انویسٹمنٹ کیس میں بری کردیا گیا ہے ۔ سابق وزیر اعظم کو فیصلہ سنائے جانے کے بعد احتساب عدالت کے کمرہ میں ہی حراست میں لے گیا اور اب انہیں اڈیالہ جیل منتقل کیا جائےگا۔ پاکستانی میڈیا کی خبروں کے مطابق احتساب عدالت کے جج ارشد ملک نے ریفرنسز پر فیصلہ سنایا۔  نواز شریف فیصلہ سننے کے لیے خود بھی عدالت میں موجود تھے۔ عدالت نے اپنے فیصلہ میں کہا کہ فلیگ شپ ریفرنس میں کیس نہیں بنتا، اس لیے نواز شریف کو بری کیا جاتا ہے۔ تاہم عدالت نے کہا کہ العزیزیہ ریفرنس میں کافی ٹھوس ثبوت موجود ہیں، اس لئے انہیں  7 سال قید کی سزا سنائی جاتی ہے۔