چورانوے منٹ میں اورنگ آباد سے ممبئی پہنچا دل ، چار سال کی بچی کو ملی نئی زندگی
01:23PM Sun 24 Jun, 2018
Share:
اورنگ آباد سے ممبئی تک ایک زندہ دل کو ایک گھنٹے اور 34 منٹ میں لے جایا گیا ۔ 323.5 کلو میٹر کی دوری اتنے کم وقت میں پوری کرلی گئی ، کیونکہ اس کی ضرورت ایک بچی کو تھی۔ دل کے ممبئی پہنچنے کے بعد اسے چار سال کی لڑکی میں کامیاب طریقہ سے ٹرانسپلانٹ کیا گیا ۔ اسپتال کی جانب سے جاری بیان کے مطابق آپریشن کامیاب رہا ۔ جالنا کی رہنے والی لڑکی فی الحال اسپتال کی نگرانی میں ہے۔
اسپتال کی جانب سے جاری بیان میں کہا گیا ہے کہ ایک سڑک حادثہ میں فوت ہوئے 13 سالہ لڑکے کا زندہ دل جمعہ کو اورنگ آباد کے ایم جی ایم اسپتال میں ملا ۔ یہاں سے 1:50 بجے اورنگ آباد ہوائی اڈہ کیلئے لے جایا گیا ۔
اسپتال نے کہا کہ ہوائی اڈہ تک گرین کوریڈور کے ذریعہ 4.8 کلو میٹر کا راستہ چار منٹ یعنی 01:54 بجے طے کرلیا گیا ، اس کے بعد ایک چارٹرڈ فلائٹ کے ذریعہ 03:05 بجے ممبئی ہوائی اڈہ پہنچا ، جہاں سے اسے 19 منٹ میں 18 کلو میٹر دور فورٹس اسپتال میں ایک گرین کوریڈور کے ذریعہ پہنچایا گیا ۔ فورٹس اسپتال کے افسران کے مطابق اورنگ آباد میں دل ملنے کے بعد ایک گھنٹہ 34 منٹ کے اندر ممبئی پہنچادیا گیا۔
