ایغور مسلمانوں کا معاملہ: امریکہ نے چین پر عائد کردی پابندیاں، چین کا جوابی اقدام کا انتباہ

واشنگٹن: امریکی صدر ڈونالڈ ٹرمپ نے چین کے مغرب بعید میں واقع سنکیانگ میں ایغور مسلمانوں پر مبینہ جبروظلم کے ذمہ داروں کے خلاف نئی پابندیوں کا مطالبہ کرنے والے قانونساز فیصلے پر کل دستخط کر دیئے۔ چین نے اس امریکی اقدام پر تنقید کرتے ہوئے کہا ہے کہ سنکیانگ خطے میں چین کی پالیسی پر بدنیتی سے حملہ کیا گیا ہے۔ چین نے کہا ہے اس کی جوابی کارروائی کا ذمہ دار امریکہ ہوگا۔ چینی وزارت خارجہ نے اسے چین کے داخلی معاملات میں راست مداخلت گردانا ہے۔ یہ پابندیاں ایغور مسلم اقلیت کے خلاف بیجنگ حکومت کے مبینہ امتیازی سلوک کی وجہ سے عائد کی گئی ہیں۔ امریکی کانگریس میں ان پابندیوں سے متعلق ایک مسودہ مئی میں پیش کیا گیا تھا۔ یہ پابندیاں براہ راست ان چینی اہلکاروں کیخلاف ہیں، جو ایغور مسلمانوں کی بڑے پیمانے پر گرفتاریوں میں مبینہ طور پرملوث رہے۔ امریکہ اور چین کے مابین کورونا وائرس اور تجارتی جنگ کی وجہ سے تعلقات پہلے سے ہی کشیدہ ہیں۔ ان پابندیوں سے ان میں مزید شدت پیدا ہو سکتی ہے۔