امریکی صدر ٹرمپ کا بڑا اعلان ، مارا گیا ابو بکر البغدادی ، سرنگ میں گھرنے پر خود کو بم سے اڑا لیا

ڈونالڈ ٹرمپ نے بتایا کہ بغدادی کے ذریعہ ایک دھماکہ میں اس کے تین بچے بھی مارے گئے ، جس کو بھگانے کی کوشش میں وہ اپنے ساتھ لے گیا تھا ۔ انہوں نے کہا کہ بغدادی اب کسی بے گناہ مرد ، عورت یا بچہ کو نہیں مار پائے گا ۔ وہ کتے کی موت مرا ، ایک بزدل کی طرح مرا ، دنیا اب ایک زیادہ محفوظ جگہ ہے ۔ امریکی صدر نے اس مشن میں مدد کیلئے روس ، ترکی ، شام کا بھی شکریہ ادا کیا ۔ اس کے ساتھ ہی انہوں نے کہا کہ میں فوج اور بحریہ کا بھی شکریہ ادا کرنا چاہتا ہوں ، جنہوں نے اس مشن کو پورا کیا ۔ قابل ذکر ہے کہ اس سے پہلے ٹرمپ نے کوئی تفصیلی جانکاری دئے بغیر اتوار کی صبح ٹویٹ کیا تھا کہ کچھ بہت بڑا ہوا ہے ۔ ٹرمپ کے اس ٹویٹ کو بغدادی کے خاتمہ سے ہی جوڑ کر دیکھا جارہا تھا ۔ حالانکہ اس وقت اس کی تصدیق نہیں کی گئی تھی ۔