Uttara Kannada Bans Water Sports During Monsoon Season

بھٹکل: 31 مئی 26 (بھٹکلیس نیوز بیورو)   مانسون کے موسم کے پیشِ نظر اتر کینرا ضلعی انتظامیہ نے یکم جون سے 31 اگست 2026 تک تمام واٹر اسپورٹس اور سمندری تفریحی سرگرمیوں پر عارضی پابندی عائد کر دی ہے۔

ڈپٹی کمشنر اور ڈسٹرکٹ ڈیزاسٹر مینجمنٹ اتھارٹی (DDMA) کی چیئرپرسن محترمہ لکشمی پریا (IAS) کی جانب سے جاری کردہ حکم نامہ کے مطابق مانسون کے دوران سمندر، دریاؤں اور جھیلوں میں پانی کا بہاؤ تیز ہونے، بلند لہروں اور اچانک سیلاب کے خطرات کے باعث یہ فیصلہ لیا گیا ہے تاکہ انسانی جانوں کا تحفظ یقینی بنایا جا سکے۔

پابندی کے دوران ریور رافٹنگ، بوٹنگ، جیٹ اسکی، کایاکنگ، بنانا رائیڈ، پیرا سیلنگ، اسپیڈ بوٹ رائیڈ، سکوبا ڈائیونگ اور دیگر تمام واٹر اسپورٹس سرگرمیاں بند رہیں گی۔ اس کے علاوہ ساحلی علاقوں میں سیاحتی اور تجارتی مہم جوئی کی سرگرمیوں پر بھی روک رہے گی۔

ضلعی انتظامیہ نے پولیس، محکمہ سیاحت، محکمہ ماہی گیری اور دیگر متعلقہ محکموں کو ہدایت دی ہے کہ وہ اس حکم پر سختی سے عمل درآمد کو یقینی بنائیں۔ انتظامیہ نے خبردار کیا ہے کہ پابندی کی خلاف ورزی کرنے والوں کے خلاف ڈیزاسٹر مینجمنٹ ایکٹ 2005 کے تحت قانونی کارروائی کی جائے گی۔