شرمناک! یوپی پولیس نے روزہ دار کو بری طرح پیٹا، پیشاب پلانے کی دی دھمکی

گورکھپور۔ یوپی پولیس کا ایک اور خوفناک چہرہ سامنے آیا ہے۔ گورکھپور میں ایک ایس ایچ او نے ایک روزہ دار پر ایسا ظلم ڈھایا کہ جسے سن کر کسی کے بھی رونگٹے کھڑے ہو جائیں گے۔ یہاں وردی کے رعب میں ایک ایس ایچ او نے ایک روزہ دار کو جم کر پیٹا اور جب اس نے پانی مانگا تو اسے پیشاب پلانے کی دھمکی دے دی۔ معاملہ گورکھپور کے گگہا تھانے سے منسلک ہے جہاں پیسے کے لین دین میں مقروض پرویز عالم رہائشی گرام گجپور تھانہ گگہا کو ایس ایچ او نے محض اس وجہ سے مارا پیٹا کیونکہ علاقے کے با اثر لوگوں سے اس نے کچھ پیسے سود پر لئے تھے اور ان سے سود کی رقم کو لے کر تنازعہ ہو گیا تھا۔ سودخوروں کے کہنے پر 7 جون کو گگہا تھانے کے گجپور چوکی کے انچارج اور سپاہیوں نے پرویز کو جم کر مارا پیٹا۔ اتنا ہی نہیں، چوکی انچارج آر این دوبے اور سپاہیوں نے اسے پانی مانگنے پر پیشاب پلانے کی دھمکی دے ڈالی۔ اس معاملے کو لے کر آج گورکھپور کے ڈی آئی جی شیو ساگرسنگھ سے مسلمانوں کے ایک گروپ نے ملاقات کی اور چوکی انچارج کے خلاف سخت سے سخت کارروائی کا مطالبہ کیا۔ اس واقعہ کی معلومات ہونے پر سماج وادی پارٹی کے سینئر لیڈر ظفر امین ڈككو بھی متاثرین کے ساتھ ڈی آئی جی سے ملے اور متاثر شخص کو انصاف دلانے کی مانگ کی۔ اس سلسلے میں ڈی آئی جی شیوساگر سنگھ نے بتایا کہ معاملے کو سنجیدگی سے لیا جائے گا اور تحقیقات کراکر جو بھی لوگ مجرم پائے جائیں گے، ان پر سخت سے سخت کارروائی کی جائے گی۔