پی این بی گھوٹالہ : کانگریس کا وزیر اعظم مودی پر نشانہ ، چوکیدار تلواتے رہے پکوڑا ، بھاگ گیا چور

نئی دہلی : پنجاب نیشنل بینک کے ساتھ 11 ہزار کروڑ روپے سے زیادہ کی جعل سازی کو لے کر کانگریس نے ایک مرتبہ پھر بی جے پی اور وزیر اعظم مودی پر نشانہ سادھا ہے ۔ کانگریس کے سینئر لیڈر کپل سبل نے یہاں پریس کانفرنس میں کہا کہ ملک میں 21 ہزار کروڑ روپے سے زیادہ کا بینک گھپلہ ہوا ہے۔ بینکوں سے ملک کے عوام کا اعتماد ختم ہو رہا ہے، اس لئے اس پر مسٹر مودی کو خود عوام کو اعتماد میں لینا چاہئے تھا اور اس بارے میں بیان دینا چاہئے تھا۔ وزیر اعظم کے ساتھ ہی وزارت خزانہ اور ریزرو بینک کو بھی اس بارے میں بولنا چاہیے۔ انہوں نے کہا کہ وزیر اعظم کو معلوم تھا کہ ملک کو لوٹاجا رہا ہے، پھر بھی گھپلے بازوں کو بینک قرض دینے کے لئے ساکھ کی حد بڑھائی گئی، قرض دینے کے قوانین میں چھوٹ دی گئی اور اکیلے 2017 میں 151 لیٹر آف آڈراسٹنڈنگ دیئے گئے جن کی بنیاد پر بینکوں نے قرض دیا ہے۔ یہ سب حکومت کو معلوم تھا، لیکن قرض لینے والے حکومت کے چہیتے تھے لہذا سارے قوانین بالائے طاق رکھے گئے اور گھپلہ کرایا گیا۔