پٹرول اور ڈیزل کی قیمتوں کو لے کر حکومت نے کیا یہ بڑا فیصلہ ، پڑھیں آپ پر کیا پڑے گا اثر ؟

سرکاری تیل کمپنیاں ( ایچ پی سی ایل ، بی پی سی ایل ، آئی او سی ) اب پٹرول ڈیزل کی فروخت پر ایک روپے فی لیٹر کا بوجھ نہیں اٹھائیں گی ۔ وزارت خزانہ کے ذرائع کے مطابق خام تیل کی قیمتوں میں آئی گراوٹ کے پیش نظر پٹرول اور ڈیزل کی قیمتیں لگاتارکم ہورہی ہیں ، اس لئے کمپنیاں اس کو واپس لے سکتی ہیں ۔ آپ کو بتادیں کہ اکتوبر مہینے میں مرکزی حکومت نے پٹرول ڈیزل پر ڈیڑھ روپے ایکسائز ڈیوٹی کم کرنے کا فیصلہ کیا تھا ۔ ساتھ ہی تیل کمپنیوں کو بھی ایک روپے فی لیٹر کا بوجھ اٹھانے کیلئے کہا تھا ۔ اس کا مطلب یہ ہے کہ سرکاری تیل کمپنیاں ، جو ملک میں سب سے زیادہ پٹرول اور ڈیزل فروخت کرتی ہیں ، صارفین کو خام تیل کی قیمتوں میں گراوٹ کے سبھی فائدے نہیں دیں گی کیونکہ وہ اس مارجن ہٹ کو حاصل کرنا چاہتی ہیں جو وہ لے رہی ہیں۔