مغربی بنگال میں رتھ یاترا کو لے کر بی جے پی کو جھٹکا ، سپریم کورٹ میں نہیں ہوگی فوری سماعت

سپریم کورٹ نے مغربی بنگال میں بی جے پی کی رتھ یاترا پر فوری سماعت کے مطالبہ کو خارج کردیا ہے ۔ چھٹیوں کی وجہ سے سپریم کورٹ کے رجسٹرار نے کیس کی سماعت سے منع کردیا ہے ۔ بتادیں کہ جنوری کے دوسرے ہفتے میں ہی اب اس معاملہ کی سماعت ہوسکے گی ۔ آپ کو بتادیں کہ گزشتہ ہفتہ کلکتہ ہائی کورٹ کی ڈویزن بینچ نے رتھ یاترا کی اجازت پر اسٹے لگادیا تھا ۔ ممتا بنرجی کی حکومت نے سنگل بینچ کے فیصلہ کو چیلنج کیا تھا ، جس پر سماعت کرتے ہوئے عدالت نے سنگل بینچ کو انٹلی جنس رپورٹ پر ایک مرتبہ پھر سے غور کرنے کیلئے کہا تھا ۔ہائی کورٹ کے فیصلہ کو ایک طرح سے ممتا حکومت کی کامیابی کی طرح دیکھا جارہا ہے کیونکہ عدالت کی کارروائی اب جنوری میں ہی دوبارہ شروع ہوگی ۔