کولکاتہ میں ہائی وولٹیج ڈراما ، پولیس کمشنر کے گھر چھاپہ مارنے پہنچے پانچ سی بی آئی افسران حراست میں

مغربی بنگال کے مشہور شاردا چٹ فنڈ اور روز ویلی گھوٹالہ معاملہ میں کولکاتہ پولیس کمشنر راجیو کمار کا نام بھی سامنے آیا ہے۔ اتوار شام سی بی آئی کی ایک ٹیم کولکاتہ پولیس کمشنر راجیو کمار کے گھر پر چھاپہ مارنے پہنچی ۔ اس کو لے کر سی بی آئی ٹیم اور کولکاتہ پولیس کی ٹیم کے درمیان کہا سنی ہوگئی اور ہاتھا پائی تک نوبت پہنچ گئی ۔ بتایا جارہا ہے کہ پولیس نے سی بی آئی ٹیم کو راجیو کمار کے گھر میں داخل ہونے سے روک دیا ہے ۔ وہیں ایسی خبریں بھی ہیں کہ پولیس سی بی آئی کے پانچ افسران کو تھانے لے کر گئی ہے۔ پورے معاملہ کی جانکاری ملنے کے بعد مغربی بنگال کی وزیر اعلی ممتا بنرجی پولیس کمشنر راجیو کمار کے گھر پہنچ چکی ہیں ۔ بتادیں کہ سی بی آئی شاردا چٹ فنڈ معاملہ میں کولکاتہ پولیس کمشنر راجیو کمار کی پوچھ تاچھ کیلئے تلاش کررہی ہے۔ راجیو کمار کئی دنوں سے لاپتہ بتائے جارہے ہیں ۔