بقرعید پر کچھ بھی روایت کے خلاف نہ ہو، ممنوعہ جانور کی قربانی قطعی برداشت نہیں کی جائے گی : یوگی آدتیہ ناتھ

اترپردیش کے وزیراعلی یوگی آدتیہ ناتھ نے عید سے قبل کی تیاریوں کا جائزہ لیتے ہوئے آج انتظامیہ اور پولیس حکام کو ہدایت دی کہ تہوار پر روایت کے خلاف کچھ بھی نہ ہو ، اگر انتظامیہ کی پالیسیوں کے خلاف کوئی کام کرے گا ، تو اس کے خلاف سخت کارروائی ہوگی اور اعلی حکام کو اس کے لئے جوابدہ بنایا جائے گا۔ وزیراعلی نے ویڈیو کانفرنسنگ کے ذریعہ عید سے قبل تیاریوں کا جائزہ لینے کے ساتھ قانون اور جرائم کے معاملہ پر حکام سے بات چیت کرتے ہوئے دو ٹوک الفاظ میں کہا کہ ممنوعہ جانوروں کی قربانی قطعی برداشت نہیں کی جائے گی اور ایسا کرنے والے کے خلاف سخت کارروائی کی جائے گی۔ روایتی مقامات پر ہی نماز اور قربانی کی جائے ، روایت کے خلاف کچھ بھی نہیں ہونے دیا جائے ۔ قربانی کے بعد باقیات کو ندی نالوں میں نہیں بہایا جائے۔ باقیات کو فوراََ ہٹایا جائے تاکہ گندگی سے بچا جائے۔