آڈیو ٹیپ کیس میں بی جے پی لیڈر بی ایس یدی یورپا کو ہائی کورٹ نے دیا عبوری اسٹے

بی جے پی کرناٹک یونٹ کے صدر بی ایس یدی یورپا کیلئے گلبرگہ سے راحت کی خبر ملی ہے۔ کرناٹک ہائیکورٹ کی گلبرگہ بینچ نے آڈیو ٹیپ معاملہ میں بی جے پی کے ریاستی صدر کو عبوری اسٹے دیدیا ہے۔ جسٹس پی جی ایم پاٹل نے جمعرات کو معاملہ کی سماعت کی تھی اور فیصلہ جمعہ تک محفوظ کر دیا تھا۔ جمعہ کو جسٹس پاٹل نے یدی یورپا کے خلاف دائر کی گئی ایف آئی آر کو کالعدم قرار دیتے ہوئے عبوری اسٹے دیا۔ یدی یورپا کے ساتھ ساتھ بی جے پی کے دیگرتین لیڈران کو بھی راحت ملی ہے۔ حلقہ اسمبلی گرمٹکل کے جے ڈی ایس ایم ایل اے ناگن گوڈا کندکور کے فرزند شرن گوڈا نے یہ کیس دائر کیا تھا۔ بی ایس یدی یورپا کے وکیل نے عدالت کے روبرو واضح کیا کہ زیر سماعت معاملہ رشوت ستانی کے دائرے میں نہیں آتا ہے۔ وکیل دفاع نے کہا کہ یدی یورپا کی بات چیت انسداد رشوت ستانی ایکٹ کے دائرے میں بھی نہیں آتی۔ یدی یورپا کے وکیل کے مطابق بی جے پی صدر نے صرف اتنا کہا ہے کہ اگر جے ڈی ایس ایم ایل اے پارٹی چھوڑ کر بی جے پی میں شمولیت اختیار کرتے ہیں تو ان کے دوبارہ انتخابات کے اخراجات بی جے پی برداشت کرے گی۔