چوطرفہ تنقید کے بعد سلفی مسلک سے متعلق متنازع بیان پر ممبر پارلیمنٹ مولانا بدر الدین اجمل نے مانگی معافی

آل انڈیا یونائٹیڈ ڈیموکریٹک فرنٹ (اے آئی یوڈی ایف) کے سربراہ اورلوک سبھا ممبرپارلیمنٹ بدرالدین اجمل نے گزشتہ روز پارلیمنٹ میں سلفی مسلک سے متعلق دئے اپنے متنازع بیان پر چوطرفہ تنقید کے بعد معافی مانگ لی ہے ۔ انہوں نے ایک پریس ریلیز جاری کرتے ہوئے کہا ہے کہ گزشتہ روز پارلیمنٹ میں طلاق بل پر بحث میں شرکت کرتے ہوئے میں نے سبقت لسانی میں اپنے سلفی بھائیوں سے متعلق ایک غلط اور بے اصل بات کہہ دی تھی ، جس کا مجھے بہت احساس ہے اور میں اپنے بیان سے معذرت کے ساتھ رجوع کرتا ہوں ۔ بدرالدین اجمل نے اپنی پریس ریلیز میں مزید کہا ہے کہ میرا سلفی بھائیوں کے متعلق یہ موقف بالکل بھی نہیں ہے کہ وہ دہشت گردی کی حمایت کرتے ہیں یا وہ دہشت گردی میں ملوث ہیں ۔ اس لئے میں اپنی غلطی کا احساس کرتے ہوئے پارلیمنٹ میں دئے گئے بیان سے معذرت کے ساتھ رجوع کرتا ہوں ۔ اللہ سے دعا کرتوں کہ وہ ہماری کمیوں کو دور کرے ۔ پارلیمنٹ کے ضابطہ کے مطابق میں نے اپنی تقریر کے اس حصہ کو پارلیمنٹ کے ریکارڈ سے ہٹانے کی بھی درخواست دیدی ہے ، جس کے بعد انشاء اللہ وہاں سے بھی وہ حصہ ہٹ جائے گا۔