کرناٹک : یدی یورپا حکومت پر لٹکی تلوار، کل شام چار بجے ہوگا فلور ٹیسٹ
09:32AM Fri 18 May, 2018
Share:
نئی دہلی: سپریم کورٹ نے کرناٹک اسمبلی میں کل شام چار بجے تحریک اعتماد پر ووٹ کرانے کا حکم دیا ہے۔جسٹس اے کے سیکری، جسٹس ایس اے بوبڑے اور جسٹس اشوک بھوشن کی بنچ نے کانگریس- جے ڈی (سیکولر) اتحاد کی درخواست پر یہ عبوری حکم دیا۔ عدالت عظمی نے ریاست کی بی جے پی حکومت کی طرف سے خفیہ ووٹنگ کرانے کی مرکزی حکومت کی درخواست مسترد کر دی ہے۔
عدالت نے کہا کہ سب سے پہلے اسمبلی کا عارضی اسپیکر( پروٹیم اسپیکر) مقرر کیا جائے گا۔ کل چار بجے سے پہلے تمام ممبران اسمبلی کو حلف دلایا جائے گا اور چار بجے اعتماد کا ووٹ حاصل کرنا ہوگا۔ تحریک اعتماد کے عمل کی ویڈیوگرافی نہیں کرائی جائے گی۔ عدالت نے یہ بھی واضح کیا کہ اس دوران بی ایس یدی یورپا حکومت نہ تو کوئی پالیسی کا فیصلہ کرے گی اور نہ ہی اینگلو- انڈین شخص کو اسمبلی میں رکن نامزد کرے گی۔
عدالت نے ریاست کے پولس ڈائریکٹر جنرل کو تمام ممبران اسمبلی کو تحفظ فراہم کرنے کا حکم دیا ہے۔ عدالت عظمی نے اکثریت کے لئے ضروری ممبران اسمبلی کی حمایت نہ ہونے کے باوجود کسی ایک بڑی پارٹی کو گورنر کی طرف سے حکومت بنانے کے لئے مدعو کئے جانے کے معاملے پر 10 ہفتے بعد سماعت کرنے کا فیصلہ کیا ہے۔
خیال رہے کہ کرناٹک میں سب سے بڑی پارٹی بن کر سامنے آئی بی جے پی کے لیڈر بی ایس یدی یورپا نے تنازع کے درمیان جمعرات کو وزیر اعلی عہدہ کا حلف لیا ۔ گورنر نے اکثریت کی حامل کانگریس - جے ڈی ایس اتحاد کو حکومت بنانے کیلئے مدعو نہیں کیا ، جسے لے کر دونوں پارٹیاں ناراض ہیں۔ کانگریس نے گورنر کے فیصلہ کو جمہوریت کا قتل قرار دیا ۔
