جون پور: عالمی شہرت یافتہ اسلامی اسکالر ڈاکٹر ذاکر نائک پر گزشتہ چند دنوں سے انڈین میڈیا کی طرف سے مسلسل کئے جا رہے حملے کے خلاف سخت احتجاج کرتے ہوئے راشٹریہ علماء كونسل کے قومی صدر مولانا عامر رشادی نے کہا کہ ڈاکٹر ذاکر نائک پر ہندوستانی میڈیا کا حملہ صرف ایک شخص پر حملہ نہیں بلکہ یہ ڈاکٹر ذاکر نائک کی اسلامی شناخت پر حملہ ہے۔

انہوں نے کہا کہ ڈاکٹر ذاکر نائک کے بہت سے بیان سے نقطہ نظر کے حساب سے اتفاق نہیں کر سکتے لیکن ان کے بیان کو دہشت گردی سے جوڑنا اور انہیں دہشت گردی کی حوصلہ افزائی کرنے والا بتانا غلط ہوگا اور اس کی سخت سے سخت مذمت ہونی چاہئے۔ انہوں نے کہا کہ یہ حیرت انگیز ہے کہ ہندوستانی شہری ہوکر گزشتہ دس سالوں سے پیس ٹی وی چلانے والے ڈاکٹر ذاکر نایک کے ہزاروں بیانات میں سے کسی بھی بیان پر آج تک ہندوستانی حکومت کو کوئی بھی اعتراض نہیں ہوا، لیکن اچانک بنگلہ دیش کے دہشت گردانہ حملے میں ملوث ایک دہشت گرد کی طرف سے شئیر کی گئی فیس بک پوسٹ کو بنیاد بنا کر ان کے خلاف ہندوستان میں قانونی کارروائی کرنے کے ساتھ ان کے چینل پر پابندی عائد کرنے کی بات کی جا رہی ہے۔ مولانا نے کہا کہ جس شخص کے سوشل مڈيا پر کروڑوں فالوورز ہوں اس کے کسی پوسٹ یا بیان کو کوئی بھی مشتبہ شخص شئیر کر سکتا ہے تو کیا اس مشتبہ شخص کے ساتھ ڈاکٹر ذاکر نائک کو جوڑ دیا جائے گا۔