الوداع " چاندنی " : پورے سرکاری اعزاز کے ساتھ سری دیوی کی آخری رسومات ادا

ممبئی : بالی ووڈ کی معروف اداکارہ سری دیوی کی پورے سرکاری اعزاز کے ساتھ ممبئی کے ولے پارلے شمشان گھاٹ میں آخری رسومات ادا کی گئیں ۔ شوہر بو نی کپور نے اداکارہ کو اگنی دی ۔ اس موقع پر بالی ووڈ کی تمام بڑی ہستیاں موجود تھیں ، جنہوں نے نمناک آنکھوں سے انہیں الوداع کہا ۔ سری دیوی کو دلہن کی طرح سجایا گیا تھا اور ان کے جسد خاکی کو ترنگا میں لپیٹا گیا تھا ۔ یہی نہیں جس ٹرک کے ذریعہ انہیں سلیبریشن اسپورٹس کلب سے شمشان گھاٹ لے جایا گیا ، اس ٹرک کو بھی سفید پھولوں سے پوری طرح سے سجایا گیا تھا۔ سری دیوی کے جسد خاکی کو شمشان گھاٹ لے جانے کے دوران ٹرک میں ان کے ساتھ بونی کپور ، بیٹا ارجن کپور اور دیور سنجے و انل کپور بھی موجود تھے ۔ ولے پارلے شمشان گھاٹ میں ان کو آخری مرتبہ الوداع کہنے کیلئے بالی ووڈ کے مہا نایک امیتابھ بچن اور کنگ شاہ رخ خان سمیت فلم انڈسٹری کی تقریبا سبھی شخصیات موجود تھیں ۔