یو پی: بی جے پی رکن پارلیمنٹ نے رکن اسمبلی پر برسایا جوتا، ویڈیو وائرل

اتر پردیش کے سنت کبیر نگر میں بی جے پی رکن پارلیمنٹ اور بی جے پی رکن اسمبلی کا ایک شرمسار کرنے والا ویڈیو منظر عام پر آیا ہے۔ دراصل سنت کبیر نگر میں ضلع منصوبہ کمیٹی کی میٹنگ ہو رہی تھی۔ اس دوران ایک ایسا واقعہ ہوا جس کے بارے میں جان کر ہر کوئی حیران و ششدر ہے۔ دراصل میٹنگ میں بی جے پی رکن پارلیمنٹ شرد ترپاٹھی اور بی جے پی کے ہی رکن اسمبلی راکیش سنگھ کے درمیان کسی بات کو لے کر زبردست بحث ہو گئی۔ بحث اس قدر بڑھ گئی کہ دونوں بی جے پی لیڈر آپس میں متصادم ہو گئے اور اس درمیان بی جے پی رکن پارلیمنٹ نے اپنے پیروں سے جوتے نکال کر رکن اسمبلی پر ایک کے بعد ایک برسانا شروع کر دیا۔ جب تک لوگ شرد ترپاٹھی کو روکتے، اس وقت تک انھوں نے راکیش سنگھ کو دس بارہ جوتے لگا دیے تھے۔ اس واقعہ کا ویڈیو سوشل میڈیا پر خوب وائرل ہو رہا ہے۔