سری لنکا حکومت نے مسجد کے ٹرسٹیوں کو دی سخت وارننگ ، کہا : یہ کام کیا تو ہوگی سخت کارروائی

سری لنکا کی حکومت نے جمعہ کو ملک کی سبھی مساجد کے ٹرسٹیوں کو وارننگ دے کر کہا ہے کہ نفرت کی تشہیر کو فروغ دینے والی میٹنگوں میں نہ تو جائیں اور نہ ہی ان کو منظوری دیں۔ ساتھ ہی حکومت نے مذہبی تقریروں کی سبھی ریکارڈنگ افسران کو دستیاب کروانے کی بھی ہدایت دی ہے ۔ غور طلب ہے کہ گزشتہ ماہ سری لنکا میں ہوئے دھماکوں میں 250 سے زیادہ افراد کی موت ہوگئی تھی اور 500 سے زیادہ زخمی ہوگئے تھے ۔ اس دہشت گردانہ حملے میں مرنے والوں میں 10 ہندوستانی سمیت 44 غیر ملکی باشندے تھے ۔ غور طلب ہے کہ سری لنکا میں ہوئے سلسلہ وار دھماکوں کے بعد سیکورٹی فورسیز نے ملک بھر میں تلاشی مہم چلائی تھی ۔ بتایا جاتا ہے کہ اس دوران کئی مساجد سے سیکورٹی فورسیز نے تلوار اور دیگر ہتھیار برآمد کئے تھے ، جس کے بعد ہی اب حکومت نے یہ وارننگ جاری کی ہے۔