یونیسکو کی اہم قرار داد منظور ، دیوار گریہ اور مسجد اقصی پر مسلمانوں کا حق ، یہودیوں کا دعویٰ باطل قرار

اقوام متحدہ کے ادارہ برائے سائنس وثقافت یونیسکو نے ایک اہم قرارداد پر رائے شماری کے بعد مسلمانوں کے قبلہ اول مسجد اقصی اور دیوار گریہ پر یہودیوں کا مذہبی رسومات کی ادائی کے حق کا دعویٰ باطل قرار دیا ہے ، جس پر صہیونی حکومت کی جانب سے شدید رد عمل سامنے آیا ہے۔(تصاویر : مرکز اطلاعات فلسطین) ۔ خبروں کے مطابق یونیسکو میں جمعرات کو منظور ہونے والی ایک قرارداد میں واضح طور پر کہا گیا ہے کہ مسجد اقصی اور دیواربراق پر یہودیوں کا کوئی حق نہیں۔ یہ جگہ مسلمانوں کا تاریخی مذہبی مقام ہے۔ رائے شماری میں 26 ممالک نے قرارداد کے حق میں جب کہ 6 نے مخالفت میں ووٹ دیا۔ 26 ممالک نے رائے شماری میں حصہ نہیں لیا جب کہ دو ملک غیرحاضر رہے۔ اسرائیل نے رائے شماری روکنے کیلئے بھرپور کوشش کی اور یوروپی ملکوں کو رائے شماری سے روکنے میں کامیاب بھی رہا ۔ تاہم اس کے باوجود قرارداد منظور کر لی گئی ہے۔ خیال رہے کہ اسرائیل مسجد اقصی کی تاریخی اور اسلامی حیثیت کو مسخ کرنے کے لیے اپنی مرضی کی من گھڑت اصطلاحات استعمال کرتے ہوئے یہاں پر یہودیوں کا مذہبی حق جتلانے کی ناکام کوشش کرتا رہا ہے۔ صہیونی ریاست مسجد اقصی کی جگہ جبل ھیکل اور دیوار براق کی بجائے دیوار گریہ کی اصطلاح استعمال کرکے اس مقدس مقام کو یہودیانے کی سازشیں کرتی رہی ہے۔ یونیسکو کی ویب سائٹ پرموجود قرارداد کے متن میں کہا گیا ہے کہ مسجد اقصی اور دیوار براق صرف مسلمانوں کی ملکیت ہیں جن پر یہودیوں کا کوئی حق نہیں۔ قرارداد کی منظوری پر اسرائیل نے سخت برہمی کا اظہار کیا ہے۔ قرارداد کی منظوری کے بعد ایک بیان میں اسرائیلی وزیراعظم یاھو نے کہا کہ یہ یونیسکو کا ایک بے کار ڈرامہ ہے جو پہلے سے چلا آ رہا ہے۔ یاہو کے مطابق ایک بار پھر یونیسکونے یہ فیصلہ صادر کیا ہے کہ جبل ھیکل اور مغربی دیوار پر اسرائیل کا کوئی حق نہیں۔