سابق وزیر اعظم اٹل بہاری واجپئی کی کل ادا کی جائیں گی آخری رسومات ، سات دن کے قومی سوگ کا اعلان

سابق وزیر اعظم 'بھارت رتن اٹل بہاری واجپئی کا آج 93 سال کی عمر میں انتقال ہوگیا ۔ انہوں نے ایمس میں پانچ بج کر پانچ منٹ پر آخری سانس لی ۔ ان کی موت سے ملک بھر میں سوگ کی لہر دوڑ گئی ہے۔ ان کی آخری رسومات کل شام چار بجے ادا کی جائیں گی ۔ ان کی آخری روسومات راشٹریہ اسمرتی استھل پر انجام دی جائیں گی ۔ مرکزی کابینہ کی میٹنگ میں فیصلہ کیا گیا ہے کہ 22 اگست تک سات دنوں کا قومی سوگ رہے گا ۔ نئی دہلی میں واقع اسمرتی استھل پر سرکاری اعزاز کے ساتھ ان کی آخری رسومات ادا کی جائیں گی ۔ سبھی مرکزی اور پی ایس یو میں کل آدھے دن کی تعطیل رہے گی ۔ 22 اگست تک ملک اور بیرون ممالک ہندوستانی سفارت خانوں اور قونصلیٹ میں قومی جھنڈے آدھے جھکے رہیں گے۔