جولائی 29: کو اردو کے نامور شاعر‘ ادیب‘ نقاد‘ محقق اور مترجم ڈاکٹر عندلیبؔ شادانی کی برسی ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ نام وجاہت حسین،تخلص عندلیبؔ۔والد کا نام اشتیاق حسین۔فارسی کے مشہور عالم شاداںؔ بلگرامی سے شاگردانہ اور عقیدت مندانہ تعلق کی بنا پر اپنے آپ کو شادانی کہتے تھے(۔1897ء) 1904ء میں ضلع مراد آباد کی ایک بستی سنبھل میں پیدا ہوۓ۔ڈاکٹر شادانی کی تاریخ پیدائش پر چند اختلاف پاۓ جاتے ہیں۔بقول اصغر حسین نظیر لدھیناوی۔وجاہت حسین عندلیبؔ یکم دسمبر 1896ء کو پیدا ہوۓ۔تاریخ ادبیات مسلمانان پاک و ہند کی دسویں جلد میں بھی ان کے نام کے ساتھ 1896ء درج ہے۔دور آفریدی ان کی تاریخ پیدائش پر اسطرح روشنی ڈالتے ہیں 1897 میں اشتیاق حسین صاحب کے گھر ایک لڑکا پیدا ہوا اس کا نام وجاہت حسین رکھا گیا۔ڈاکٹر معزالدین نے ان کی پیدائش 1904ء لکھی ہے۔ان کی میٹرک کی سند میں ان کی تاریخ پیدائش یکم مارچ 1904ء درج ہے۔ وہیں کے تحصیل سکول سے اردو کا مڈل امتحان پاس کیا۔ان کی ننھیال رام پور میں تھی لیکن ان کے والد کان پور میں لکڑی کا کاروبار کرتے تھے۔رام پور میں وہ میٹرک میں تھے کہ بورڈنگ ہاؤس کے چند لڑکوں نے بورڈنگ ہاؤ س میں آگ لگا دی۔اس جرم میں لیڈر قسم کے لڑکوں کو دو سال کے لۓ سکول سے خارج کر دیا گیا۔وہ بھی اسی لپیٹ میں آ گۓنتیجتاۤ انہیں انگریزی تعلیم سے نفرت ہو گئی۔مدرسہ عالیہ رام پورہ میں داخلہ لیا جہاں اولاد حسین شاداںؔ بلگرامی اردو اور فارسی کے ہیڈ مولوی تھے منشی عالم کے سالانہ امتحان میں پورے پنجاب میں اول رہے۔دوسرے سال منشی فاضل کے امتحان میں بھی پوری یونیورسٹی میں اول آۓ۔منشی فاضل میں کامیاب ہونے کی وجہ سے پرائیویٹ طور پر میٹرک کا امتحان دینے کی اجازت مل گئی۔انہوں نے میٹرک،انٹرمیڈیٹ اور بی اے کا امتحانات انگریزی میں صرف ایک ایک سال کے وقفے سے پاس کۓ۔1925ء میں اسلامیہ کالج لاہور سے فارسی میں ایم اے کیا۔1925ء میں ریاست دوجانہ ضلع رُہتک کے نابالغ نواب کے اتالیق مقرر ہوۓ۔1926ء میں ہندو کالج دہلی میں اردو اور فارسی کے لیکچرار مقرر ہوۓ۔9 جنوری 1928ء کو اردو اور فارسی کے لیکچرار کی حیثیت سے ان کا تقرر ڈھاکہ یونیورسٹی کے شعبہ اردو فارسی میں ہوا۔1933ء میں انہوں نے لندن یونیورسٹی سے پی ایچ ڈی کی سند حاصل کی۔ان کے مقالے کا عنوان " ہندوستان کے مسلم مورخ" تھا۔1945ء میں ریڈر اور 1947ء میں پروفیسر اور صدر شعبہ مقرر ہوۓ۔ڈھاکہ یونیورسٹی میں تین بار ڈین آف دی فیکلٹی آف آرٹس بھی منتخب ہوۓ۔1930ء مین انہوں نے اپنے شوق سے ایران کا سفر کیا،قیام پاکستان کے بعد دو بار پاکستانی وفد کے رکن کی حیثیت سے ایران گۓ اور ایک مرتبہ متبادل استادہ کے پروگرام میں امریکہ مدعو کۓ گۓ۔مئی 1969ء میں ملازمت سے سبکدوش ہوۓ۔29 جولائی کو ڈھاکہ ہی میں وفات پائی۔وفات سے چند روز پہلے ڈھاکہ یونیورسٹی نے انہیں پروفیسر ایمی ریٹس کا عہدہ عطا کیا۔ ان کی پہلی شادی سے تین اولادیں ہوئیں۔ایک بیٹی دو بیٹے۔بیٹوں میں بڑے پرویزؔ شادانی حبیب بنک کراچی میں کسی عہدے پر فائض ہیں یا تھے۔دوسرے بیٹے خسروؔ شادانی جو کہ پاکستان ائیر فورس میں اسکوارڈن لیڈر تھے۔دسمبر 1971 کی جنگ میں شہید ہوۓ۔ ان کی دوسری شادی سے دو اولادیں ہیں۔عینی نشاط جو ایک اطالوی صحافی سے شادی کر کے اپنے شوہر کے ساتھ پیرس میں رہتی ہیں۔بیٹا عامرؔ شادانی پاکستان کی وزارت خارجہ میں سیکشن آفیسر یں۔ ان کی مطبوعہ تصانیف حسب ذیل ہیں تحقیقات۔۔۔۔۔۔۔۔ تحقیق مضامین کا مجموعہ سچی کہانیاں۔۔۔۔۔۔ سچی کہانیوں کا پہلا مجموعہ نوش و نیش۔۔۔۔۔۔۔۔ سچی کہانیوں کا دوسرا مجموعہ چھوٹا خدا۔۔۔۔۔۔۔۔۔۔۔۔ ایک سچی کہانی اور ایک ڈرامے کا مجموعہ نشاط رفتہ۔۔۔۔۔۔۔ مجموعہ کلام (غزلیں اور نظمیں) تحقیق کی روشنی میں۔۔۔۔۔۔تحقیق مضامیں کا دوسرا مجموعہ عہد حاضر اور اردو غزل گوئی۔۔۔۔۔۔ حسرتؔ،اصغرؔ،فانیؔ،اور جگر پر تنقیدی مضامین پیام اقبال۔۔۔۔۔۔۔۔۔۔۔اقبال پر ایک مقالہ خطبہء صدارت ہے ۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ایک دلچسپ واقعہ ۔۔۔۔۔۔۔۔۔۔۔۔۔۔ طاہرہ دیوی شیرازی کون؟ ۔۔۔۔۔۔۔۔۔۔۔۔۔۔۔۔۔۔۔۔۔ مشہور مصنفہ محترمہ قرۃ العین حیدر اپنے ایک مضمون ’’ خدیجہ مستور ایک منفرد افسانہ نگار ‘‘ میں یوں رقمطراز ہیں۔’’ایک وقت تھا جب افسانہ نگار خواتین کو خاص طور پر پُراسرار ہستیاں سمجھا جاتا تھا اور افسانوی ادب کی اس Mystique میں سر فہرست تھیں۔ یہاں تک کہ دو حضرات طاہری دیوی شیرازی اور آمنہ دیوی پر یاگی کے مہمل فرضی ناموں کے ساتھ اپنے افسانے چھپواتے تھے۔انھوں نے کسی خاتون کو خوب سجا بنا کے ان کی تصویر بھی بطور طاہرہ دیوی شیرازی کسی افسانے میں چھپوائی تھی۔ حالانکہ وہ خاتون کچھ جانکی بائی آف الہٰ آباد قسم کی معلوم ہوتی تھیں۔ کہا یہ جاتا ہے کہ غالباً اس خاتون کے پردے میں دراصل ڈاکٹر عندلیب شادانی پنہاں تھے۔ ڈاکٹر صاحب تقسیم کے بعد ڈھاکہ یونیورسٹی کے صدر شعبۂ اُردو تھے۔ ان سے ہماری آپاحمید جہاں کی شادی ہوئی تھی جو میری والدہ مرحومہ کی ایک سہیلی کی بیٹی اور علی گڑھ والی اعلیٰ بی یعنی عبداللہ بیگم کی بھانجی تھیں۔‘‘ ڈاکٹر عندلیب شادانی کے بارے میں جناب وفا راشدی اپنی کتاب ’’ بنگال میں اردو‘‘ مطبوعہ اردو پبلشنگ ھاؤس دہلی ۱۹۵۴ میں لکھتے ہیں ’’ایک مدت تک پریم پجاری کے روپ میں سچی کہانیاں لکھتے رہےجو ماہنامہ ساقی دہلی میں شائع ہوتی رہیں۔ اور بے حد پسند کی گئیں۔ سچی کہانیاں مجموعی شکل میں بھی شائع ہوچکی ہیں۔ ‘‘ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ منتخب کلام ۔۔۔۔۔۔۔۔۔۔۔۔۔۔۔۔۔۔۔۔۔ گزاری تھیں خوشی کی چند گھڑیاں انہی کی یاد میری زندگی ہے ۔۔۔۔۔۔۔۔۔۔۔۔۔۔۔۔۔۔۔۔۔۔۔۔ دل پر چوٹ پڑی ہے تب تو آہ لبوں تک آئی ہے یونہی چھن سے بول اٹھنا تو شیشے کا دستور نہیں ۔۔۔۔۔۔۔۔۔۔۔۔۔۔۔۔۔۔ میں نگاہ سے دل کا مدعا سمجھتا ہوں آؤ میں تمھیں چھیڑوں اور معذرت چاہوں ۔۔۔۔۔۔۔۔۔۔۔۔۔۔۔۔۔ میں نے مانا تمھیں مجھے سے سروکار نہ تھا جاتے جاتے مجھے کیوں تم نے پلٹ کر دیکھا ۔۔۔۔۔۔۔۔۔۔۔۔۔۔۔۔۔ جو یہ کہتے ہیں کہ ہر حال میں خوش ہیں ہم تم ان کے دل میں بھی مقدر کا گلہ ہوتا ہے ۔۔۔۔۔۔۔۔۔۔۔۔۔۔۔ یہ جانتا ہوں کہ تجھ کو میں پا نہیں سکتا ہر ایک سانس میں بڑھتی ہے آرزو تیری ۔۔۔۔۔۔۔۔۔۔۔۔۔۔۔۔ دل کا ہر گوشہ تمھاری یاد سے آباد ہے مجھ کو سب کچھ بھول جانے پر بھی سب کچھ یاد ہے ۔۔۔۔۔۔۔۔۔۔۔۔۔۔۔۔ تم جبر محبت کیا جانو،اچھا یہ بتاؤ تم نے کبھی ہنستی ہوئی آنکھوں کے پیچھے اشکوں کا سمندر دیکھا ہے ۔۔۔۔۔۔۔۔۔۔۔۔۔۔۔۔۔ ایسی ہی روداد ہے دل کی،شمع سے جیسے پروانہ دور رہے تو رہ نہ سکے اور پاس آۓ تو جل اٹھے ۔۔۔۔۔۔۔۔۔۔۔۔۔۔۔۔۔۔ رسوائی کے ڈر سے کوئی رازِ محبت چھپتا ہے آہیں روکیں،آنسو روکیں،رنگ مگر اڑ جاۓ ۔۔۔۔۔۔۔۔۔۔۔۔۔۔۔۔ مری روح ڈھونڈتی تھی کوئی مرکز تمنا میں کسی کا منتظر تھا یہ خبر نہیں کہ کس کا ۔۔۔۔۔۔۔۔۔۔۔۔۔۔۔ سنتے آۓ تھے وقت پلٹتا ہی نہیں مگر اک بھولنے والے نے ہمیں یاد کیا ۔۔۔۔۔۔۔۔۔۔۔۔۔۔۔ تسکین کسی عنوان نہیں کیا قہر محبت ہوتی ہے محفل ہو تو جی گھبراتا ہے تنہا ہوں تو وحشت ہوتی ہے ۔۔۔۔۔۔۔۔۔۔۔۔۔۔۔۔ اپنی وفا سے بڑھ کے ہے تیری وفا پہ ناز اب حسرتوں کو شکوہ حرماں نہیں رہا رکھ لی تری وفا نے محبت کی آبرو میں اپنی آرزو سے پشیماں نہیں رہا ۔۔۔۔۔۔۔۔۔۔۔۔۔۔۔ دیر لگی آنے میں تم کو شکر ہے پھر بھی آئے تو آس نے دل کا ساتھ نہ چھوڑا ویسے ہم گھبرائے تو شفق دھنک مہتاب گھٹائیں تارے نغمے بجلی پھول اس دامن میں کیا کیا کچھ ہے دامن ہاتھ میں آئے تو چاہت کے بدلے میں ہم تو بیچ د یں اپنی مرضی تک کوئی ملے تو دل کا گاہک کوئی ہمیں اپنائے تو سنی سنائی بات نہیں یہ اپنے اوپر بیتی ہے پھول نکلتے ہیں شعلوں سے چاہت آگ لگائے تو جھوٹ ہے سب تاریخ ہمیشہ اپنے کو دہراتی ہے اچھا میرا خوابِ جوانی تھوڑا سا دہرائے تو نادانی اور مجبوری میں یارو کچھ تو فرق کرو اک بےبس انسان کرے کیا ٹوٹ کے دل آجائے تو ۔۔۔۔۔۔۔۔۔۔۔۔۔۔۔۔۔۔ کیا کہیے روۓ حسن پہ عالم نقاب کا منہ پر لیا ہے مہر نے دامن سحاب کا تصویر میں نے مانگی تھی شوخی تو دیکھیے اک پھول اس نے بھیج دیا ہے گلاب کا اب کیا سنائیں ٹوٹے ہوۓ دل کی داستاں آہنگ بے مزہ ہے شکستہ رباب کا اتنے فریب کھاۓ ہیں دل نے کہ اب ہوتا ہے جوۓ آب پہ دھوکا سراب کا تم چاندنی ہو پھول ہو نغمہ ہو شعر ہو اللہ رے حسن ذوق میرے انتخاب کا اللہ بولتے نہیں تو مسکرا ہی دو میں کب سے منتظر ہوں تمھارے جواب کا سب واقعات ہیں مگر اللہ رے انقلاب آج ان پہ گماں ہے کسی رنگیں خواب کا ۔۔۔۔۔۔۔۔۔۔۔۔۔۔۔۔۔۔۔۔