خلیل احمد نے کیا ٹیم انڈیا میں ڈیبیو، ظہیرخان کی کمی پوری کرسکتا ہے یہ کھلاڑی

 سچ کہا جائے تو ہندوستان کوظہیرخان کے بعد سے ایک عدد بائیں ہاتھ کے تیزگیندباز کی تلاش ہے، لیکن کوئی ایسا گیند بازنہیں ملا، جوٹیم انڈیا میں اپنی جگہ یقینی کرسکے۔ حالانکہ جے دیوانادکٹ اوربریندرسرن کی ٹیم میں انٹری ہوئی، لیکن وہ بھی اس خالی جگہ کو بھرنے میں ناکام رہے۔ اب ہندوستانی سلیکٹروں نے نوجوان خلیل احمد پر بھروسہ جتایا ہے۔ویسے ٹیم میں شامل ہونے پرخلیل نے بھی اپنے ارادے ظاہرکردیئے ہیں۔ انہوں نے کہا کہ "اب مجھے منتخب کیا گیا ہے، میں صرف ایشیا کپ ہی نہیں ہندوستان کے لئے زیادہ سے زیادہ میچ کھیلنا چاہتا ہوں۔ میں کم ازکم 10 سالوں تک کھیلنا چاہتا ہوں اورزیادہ سے زیادہ وکٹ حاصل کرنا چاہتا ہوں"۔ ویسے خلیل احمد نے انڈر-14 راج سنگھ ڈونگرپورٹرافی میں چارمیچوں میں 26 وکٹ لے کرتہلکہ مچا دیا تھا، لیکن صحیح معنوں میں یہ نوجوان تب سرخیوں میں آیا، جب سال 2016 کے آئی پی ایل سیزن میں دہلی ڈیئرڈیولس نے انہیں 10 لاکھ روپئے کی قیمت پراپنی ٹیم میں شامل کیا۔ حالانکہ پورا سیزن یہ نوجوان بینچ پربیٹھا رہا، لیکن راہل دراوڑ کے ساتھ نے ان کی شبیہ بدل دی۔ یہی نہیں خلیل احمد 2016 انڈر-19 عالمی کپ میں بھی ٹیم کا حصہ تھے اورایشان کشن کی ٹیم کے لئے انہوں نے 6 میچوں میں تین وکٹ لئے، اس کے بعد فروری 2017 میں انہوں نے راجستھان کے لئے ٹی -20 کرکٹ میں ڈیبیوکیا۔ وہیں اسی سال اکتوبرمیں وہ فرسٹ کلاس کرکٹ میں ڈیبیوکرنے میں کامیاب رہے۔