موب لنچنگ : وزیر اعظم مودی کے بعد اب راہل گاندھی کو احمد بخاری نے لکھا خط ، موقف واضح کرنے کا مطالبہ

امام بخاری نے کہا کہ مسلم نوجوانوں کو ٹوپی پہن کر اور داڑھی رکھ کر گھر سے باہر نکلنا مشکل ہوگیا ہے۔ ان کی جان و مال کا خطرہ لاحق ہے۔ انہوں نے کہا کہ ملک میں اقلیتوں کے لئے پہلے کی طرح بے خوف ماحول بنایا جائے تاکہ وہ بے خوف ہوکر زندگی گذار سکیں۔ اس سے قبل امام بخاری نے وزیر اعظم مودی کو پیر کو لکھے خط میں بی جے پی حکومت پر انتخابی وعدہ سب کا ساتھ سب کا وکاس کو نبھانے میں ناکام رہنے کا الزام لگایا تھا۔ انہوں نے لکھا تھاکہ آپ نے ملک کے ایک سو پچیس کروڑ لوگوں کے ساتھ مساوات کا سلوک کرنے کا وعدہ کیا تھا ، لیکن افسوس کی بات ہے کہ زمینی حقیقت اس کے بالکل برخلاف ہے ۔بلکہ ملک کے ہر سمجھدار شہری کے لئے تشویش کا موجب بھی ہے۔ انہوں نے لکھا کہ گؤ رکشک کے نام ہونے والی موب لنچنگ کے واقعات پر وزیر اعظم مودی کی طرف سے سخت وارننگ کے باوجود سماج مخالف عناصر پر اس کا کوئی اثر نہیں پڑا ہے۔ انہوں نے الزام لگایا کہ بی جے پی کی حکومت بڑی چالاکی سے کچھ مرکزی وزیروں اور ممبران اسمبلی کی حوصلہ افزائی کررہی ہے جو اقلیتوں کا نام لے کر بیان دے رہے ہیں۔انہوں نے لکھا تھا کہ اب وقت آگیا ہے کہ مرکز اور ریاستوں کی حکومتیں اپنے وعدے پر عمل کریں اور مسلمانوں کے خوف کو دور کرنے کے لئے فوری ٹھوس قدم اٹھائیں۔