اجمیر: پاکستانی زائرین کی شرکت مشکوک

ایسی صورت حال میں بھارتی حکومت نے پاکستان کو یہ مشورہ دیا ہے کہ وہ اس سال اپنے باشندوں کو اجمیر کی درگاہ کی زیارت کے لیے نہ بھیجے۔ واضح رہے کہ اس سال اجمیر میں خواجہ نظام الدین چشتی کا سالانہ عرس 13 سے 23 مئی تک منایا جا رہا ہے۔ یہ ان کا 801 واں عرس ہے۔ صوفی بزرگ خواجہ معین الدین چشتی کو بر صغیر میں کافی عقیدت کی نظر سے دیکھا جاتا ہے اور ان کے عرس کے موقع پر ہر سال لاکھوں کی تعداد میں عقیدت مند اجمیر میں جمع ہوتے ہیں۔ پاکستان اور بھارت نے حال ہی میں مذہبی مقامات کی زیارت کے لیے گروپ ویزا شروع کرنے کا معاہدہ کیا تھا۔ گزشتہ دنوں پاکستان کی جیل میں ایک بھارتی شہری اور اس کے بعد بھارت کے زیر انتظام جموں کشمیر کی ایک جیل میں ایک پاکستانی شہری کو ہلاک کیے جانے کے واقعے سے دونوں ملکوں کے درمیان تعلقات مذید کشیدہ ہو گئے ہیں۔ خیال رہے کہ بھارتی شہری سربجیت سنگھ پر لاہور کی کوٹ لکھپت جیل میں قاتلانہ حملہ ہوا تھا جس کے نتیجے میں ان کی موت ہو گئی تھی۔ جس دن سربجیت سنگھ کی آخری رسومات ادا کی جا رہی تھی اسی روز بھارت کے زیر انتظام جموں کشمیر کی کوٹ بھلول جیل میں قید پاکستانی شہری ثناء اللہ پر قاتلانہ حملہ ہوا جو بعد میں چنڈی گڑھ کے ہسپتال میں دم توڑ گئے۔ اس سے قبل سخت گیر ہندو تنظیموں اور تاجر گروپ اجمیر آنے والے پاکستانی زائرین کے خلاف مظاہرہ کرنے کا منصوبہ رکھتے تھے جس کے پیش نظر سیکورٹی میں اضافہ کیا گیا تھا۔ مقامی انتظامیہ نے جمعرات کو تاجر برادری اور سخت گیر ہندو تنظیم وشو ہندو پریشد، شیو سینا اور بجرنگ دل کے نمائندوں سے بات چیت کی۔ جے پور سے نامہ نگار ناراین باریٹھ کا کہنا ہے کہ ان تنظیموں کے نمائندوں نے اجمیر درگاہ کے خادمین سے پاکستانی زائرین کا بائیکاٹ کرنے کے لیے کہا لیکن خادمین کی انجمن نے کہا کہ انہیں اس بائیکاٹ سے کوئی سروکار نہیں ہے۔ اس سے قبل بی جے پی کے رہنما اور مقامی رکن اسمبلی واسودیو دیونانی نے کہا تھا کہ انھوں نے حکومت ہند سے پاکستانی زائرین کو یہاں آنے کی اجازت نہ دینے کا مطالبہ کیا ہے۔