تاج محل کے تحفظ کے لئے سبھی فریقوں سے سپریم کورٹ نے مشورے مانگے

سپریم کورٹ نے آگرہ کے مشہور زمانہ اور تاریخی عمارت تاج محل کے تحفظ کے سلسلے میں تمام متعلقہ فریقوں سے تفصیل کے ساتھ مشورے مانگے ہیں۔ جسٹس مدن بی لوکر کی سربراہی والی خصوصی بنچ نے تاج محل کے تحفظ کے معاملے میں حکومت کے ذریعہ خصوصی کمیٹی کو ایک ماہ میں اپنی تفصیلات سونپنےکا حکم دیا ہے۔ عدالت نے تاج محل کے تحفظ (ٹی ٹی زیڈ) میں صنعتی کمپنیوں کے صحیح اعدادوشمار دستیاب نہ کرانے پر اترپردیش کی حکومت پر زبردست نکتہ چینی کی ہے۔ جسٹس لوکر نے کہا کہ اگر حکومت کے پاس ٹی ٹی زیڈ میں صنعتوں کی تعداد کا صحیح علم نہیں ہے تو اس کا مطلب یہ ہے کہ اس کے ویژن پیپر کا مسودہ ہی غلط ہے۔ یہ بہت ہی حیرت کی بات ہے کہ ابھی تک حکومت کو یہ نہیں معلوم کہ علاقے میں کتنی صنعتیں چل رہی ہیں۔