کیا یہ مسلمانوں کو دو نمبر کے شہری بنانے کی تیاری ہے؟... سہیل انجم

یہ فیصلہ کہ مذہب کی بنیاد پر شہریت دی جائے ہندوستان کے آئین کے بنیادی اصولوں کے خلاف اور ہندوستان کو ہندو راشٹر بنانے کی جانب ایک قدم ہے۔ آئین نے تمام شہریوں کو مساوات کا حق دیا ہے۔ لیکن اس قانون سے یہ حق چھینا جا رہا ہے۔ اس کے خلاف ملک کے سیکولر طبقات اٹھ کھڑے ہوئے ہیں۔ وہ ملک گیر سطح پر تحریک چلا کر اس کی مخالفت کر رہے ہیں۔

دراصل اس کی سب سے بڑی زد مسلمانوں پر پڑ رہی ہے یا پڑنے والی ہے۔ آسام میں این آر سی کی حتمی فہرست سے سے جو 19 لاکھ افراد باہر رہ گئے ہیں بتایا جاتا ہے کہ ان میں تیرہ یا چودھ لاکھ ہندو ہیں۔ حکومت این آر سی سے جو مقصد حاصل کرنا چاہ رہی تھی یعنی صرف مسلمانوں کو باہر کرنے کا، وہ پورا نہیں ہوا۔ اس لیے شہریت قانون میں ترمیم کی گئی تاکہ باہر رہ جانے والے ہندووں کو یہ کہہ کر شہریت دی جائے کہ وہ شرنارتھی ہیں۔ مسلمانوں کو اسی لیے اس قانون سے باہر رکھا گیا ہے تاکہ یہ کہا جا سکے کہ یہ تو گھس پیٹھیے ہیں ان کو شہریت نہیں دی جائے گی۔ امت شاہ پہلے ہی سینہ ٹھونک ٹھونک کر اعلان کر چکے ہیں کہ گھس پیٹھیوں کو ایک ایک کرکے نکالا جائے گا۔

اسی لیے ترمیم شدہ شہریت قانون سے مسلمانوں کو الگ رکھا گیا تاکہ انھیں باہر نکالنے میں آسانی ہو۔ اب اس کے بعد جب ملک گیر سطح پر این آر سی نافذ کیا جائے گا تو کیا ہوگا؟ ہوگا یہ کہ جہاں لاکھوں مسلمان اپنی شہریت ثابت نہیں کر پائیں گے وہیں لاکھوں ہندو بھی اپنی شہریت ثابت نہیں کر پائیں گے۔ پھر اس قانون کا سہارا لیا جائے گا اور کہا جائے گا کہ ہندو شرنارتھی ہیں اور مسلمان درانداز ہیں۔ لہٰذا ہندووں کو شہریت دی جا رہی ہے اور مسلمانوں سے شہریت چھینی جا رہی ہے۔

اس طرح آر ایس ایس کا ہندی ہندو ہندوستان کا خواب پورا ہو جائے گا۔ ہندوستان ایک ایسے معاشرے میں تبدیل ہو جائے گا جہاں ہندووں کو ہی تمام قسم کے حقوق و اختیارات حاصل ہوں گے۔ جب ایسا ہوگا تو ظاہر ہے مسلمانوں کو الیکشن لڑنے کا بھی حق نہیں ہوگا۔ اور اس طرح پارلیمنٹ اور اسمبلیاں مسلمانوں کے وجود سے خالی ہو جائیں گی۔ صرف اور صرف ہندو ہی راج کریں گے اور انھی کے ہاتھوں میں ہر قسم کی طاقت اور ہر قسم کے اختیارات ہوں گے۔