⁠⁠⁠⁠⁠آج معروف شاعر اقبال عظیم کا یومِ پیدائش ہے۔

از: ابوالحسن علی بھٹکلی

معروف شاعر اقبال عظیم 8 جولائی 1913ء کو میرٹھ میں پیدا ہوئے ۔اُن کے والدسید مقبول عظیم کا تعلق سہارن پور سے تھا۔ خود لکھنؤ اور اودھ میں پروان چڑھے ۔لکھنؤ یونیورسٹی سے 1934ء میں بی اے کی سند حاصل کی۔ پھر آگرہ چلے گئے جہاں سے 1943ء میں آگرہ یونیورسٹی سے ایم اے کی سند حاصل کی۔اُنہیں ڈھاکا یونیورسٹی سے ریسرچ اسکالر شپ ملی اور ’’ٹیچرز ٹریننگ کالج ، لکھنؤ‘‘ سے تدریسی تربیت بھی حاصل کی۔اقبال عظیم نے باقاعدہ تدریس کا آغاز’’گورنمنٹ جوبل کالج ، لکھنؤ ‘‘ سے کیا۔ساڑھے گیارہ برس یوپی کے سرکاری مدارس میں پڑھاتے رہے ۔جولائی 1950ء میں مشرقی پاکستان آگئے اور تقریباً بیس برس تک یہیں پر سرکاری ڈگری کالجوں میں پروفیسر اور صدر شعبہ اردو کی حیثیت سے فرائض انجام دیتے رہے ۔ اپریل 1970ء میں بینائی زائل ہونے کے سبب اپنے عزیز و اقارب کے پاس کراچی تشریف لے آئے ۔اُنہوں نے اپنی بے نگاہی کا ماجرا بھی اپنے ایک شعر میں خود ہی بیان کر دیا ہے : مجھے ملال نہیں اپنی بے نگاہی کا جو دیدہ ور ہیں اُنہیں بھی نظر نہیں آتا اقبال عظیم کراچی آنے کے بعد 1965ء تا 1970ء سندھ کے صوبائی سیکریٹریٹ میں ایک تحقیقاتی افسر کی حیثیت سے فرائض انجام دیتے رہے ۔ اردو شاعری کا آغاززمانہ طالب علمی سے ہی کیا ۔نعت نگاری میں آپ نے خصوصی مقام پایا۔ شاعری کا پہلا مجموعہ ’’ مضراب‘‘ 1975ء میں شایع ہوا۔اقبال عظیم کا دوسرا مجموعہ نعتوں پرمشتمل "قاب قوسین" 1977ء میں منظرِ عام پر آیا۔ تحریکِ پاکستان کی معروف شخصیت اورعظیم اردو شاعر حسرتؔ موہانی سے آپ کی گہری دوستی تھی۔پروفیسر اقبال عظیم اردو ، ہندی،عربی،فارسی اور بنگلہ زبانوں کے ماہر تھے ۔1970ء کے بعدمستقل کراچی ہی میں قیام پذیر رہے یہاں تک کہ 22 ستمبر 2000ء کو اپنے خالق حقیقی سے جاملے ۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ منتخب کلام ۔۔۔۔۔۔۔۔۔۔۔۔۔۔۔۔۔ "نبیؐ کا دیار آنکھوں میں" سے منتخب نعتیہ کلام ۔۔۔۔۔۔۔۔۔۔۔۔۔۔۔۔۔۔۔۔۔۔۔ مدینےکا سفر ہے اور میں نم دیدہ نم دیدہ جبیں افسردہ افسردہ ، قدم لغزیدہ لغزیدہ

چلا ہوں ایک مجرم کی طرح میں جانبِ طیبہ نظر شرمندہ شرمندہ بدن لرزیدہ لرزیدہ

کسی کےہاتھ نے مجھ کو سہارا دے دیا ورنہ کہاں میں اور کہاں یہ راستے پیچیدہ پیچیدہ

غلامانِ محمّدﷺ دور سے پہچانےجاتےہیں دل گرویدہ گرویدہ، سرِ شوریدہ شوریدہ

کہاں میں اور کہاں اُس روضۂ اقدس کا نظارہ نظر اُس سمت اٹھتی ہے مگر دُزدیدہ دُزدیدہ

بصارت کھو گئی لیکن بصیرت تو سلامت ہے مدینہ ہم نےدیکھا ہے مگر نادیدہ نادیدہ

وہی اقبال جس کو ناز تھا کل خوش مزاجی پر فراق طیبہ میں رہتا ہے اب رنجیدہ رنجیدہ ۔۔۔۔۔۔۔۔۔۔۔۔۔۔۔۔۔۔۔۔۔۔۔ حضور آئے تو کیا کیا ساتھ نعمت لے کے آئے ہیں اخوت ، علم و حکمت ، آدمیت لے کے آئے ہیں

کہا صدیق نے میری صداقت ان کا صدقہ ہے

عمر ہیں ان کے شاہد وہ عدالت لے کے آئے ہیں

کہا عثمان نے میری سخاوت ان کا صدقہ ہے

علی دیں گے شہادت وہ شجاعت لے کے آئے ہیں

رہے گا یہ قیامت تک سلامت معجزہ ان کا

وہ قرآن میں نور و ہدایت لے کے آئے ہیں

خدا نے رحمت للعالمیں خود ان کو فرمایا

قسم اللہ کی رحمت ہی رحمت کے کے آئے ہیں

قناعت ، حریت ، فکر و عمل ، مہر و وفا ، تقوی

وہ انساں کے لیے عظمت ہی عظمت لے کے آئے ہیں ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ کیا خبر کیا سزا مجھ کو ملتی ، میرے آقاؐ نے عزت بچا لی فردِ عصیاں مری مجھ سے لے کر، کالی کملی میں اپنی چھپا لی

وہ عطا پر عطا کرنے والے اور ہم بھی نہیں ٹلنے والے

جیسی ڈیوڑھی ہے ویسے بھکاری، جیسا داتا ہے ویسے سوالی

میں گدا ہوں مگر کس کے در کا؟ وہ جو سلطان کون و مکاں ہیں

یہ غلامی بڑی مستند ہے، میرے سر پر ہے تاج بلالی

میری عمر رواں بس ٹھہر جا، اب سفر کی ضرورت نہیں ہے

انؐ کے قدموں پہ میری جبیں ہے اور ہاتھوں میں روضے کی جالی

اِس کو کہتے ہیں بندہ نوازی، نام اِس کا ہے رحمت مزاجی

دوستوں پر بھی چشمِ کرم ہے ، دشمنوں سے بھی شیریں مقالی

میں مدینے سے کیا آگیا ہوں، زندگی جیسے بجھ سی گئی ہے

گھر کے اندر فضا سونی سونی، گھر کے باہر سماں خالی خالی

میں فقط نام لیوا ہوں انؐ کا، انؐ کی توصیف میں کیا کروں گا

میں نہ اقبال خسرو، نہ سعدی ، میں نہ قدسی نہ جامی، نہ حالی ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ میں لب کشا نہیں ہوں اور محو التجا ہوں میں محفل حرم کے آداب جانتا ہوں

جو ہیں خدا کے پیارے میں ان کو چاہتا ہوں

اُن کو اگر نہ چاہوں تو اور کس کو چاہوں

ایسا کوئی مسافر شاید کہیں نہ ہوگا

دیکھے بغیر اپنی منزل سے آشنا ہوں

کوئی تو آنکھ والا گزرے گا اس طرف سے

طیبہ کے راستے میں ، میں منتظر کھڑا ہوں

یہ روشنی سی کیا ہے ، خوشبو کہاں سے آئی؟

شاید میں چلتے چلتے روضے تک آگیا ہوں

طیبہ کے سب گدا گر پہچانتے ہیں مجھ کو

مجھ کو خبر نہیں تھی میں اس قدر بڑا ہوں

اقبال مجھ کو اب بھی محسوس ہو رہا ہے

روضے کے سامنے ہوں اور نعت پڑھ رہا ہوں ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ہر وقت تصور میں مدینے کی گلی ہے اب در بدری ہے نہ غریب الوطنی ہے

وہ شمع حرم جس سے منور ہے مدینہ

کعبے کی قسم رونق کعبہ بھی وہی ہے

اس شہر میں بک جاتے ہیں خود آ کے خریدار

یہ مصر کا بازار نہیں ، شہر نبیؐ ہے

اس ارضِ مقدس پہ ذرا دیکھ کے چلنا

اے قافلے والو یہ مدینے کی گلی ہے

نظروں کو جھکائے ہوئے خاموش گزر جاؤ

بے تاب نگاہی بھی یہاں بے ادبی ہے

نذرانہ جاں پیش کرو حلقہ بگوشو!

یہ بارگہِ ہاشمی و مطلبی ہے

اقبال میں کس منہ سے کروں مدحِ محمدؐ

منہ میرا بہت چھوٹا ہے اور بات بڑی ہے ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ بسا ہوا ہے نبیؐ کا دیار آنکھوں میں سجائے بیٹھا ہوں اک جلوہ زار آنکھوں میں

جو دن مدینے میں گزرے ہیں اُن کا کیا کہنا

رچے ہوئے ہیں وہ لیل و نہار آنکھوں میں

دیارِ پاک کا ہر منظر حسین و جمیل

رہے گا تابہ قضا یادگار آنکھوں میں

عطا کیا جو مدینے کے باسیوں نے مجھے

مہک رہا ہے ابھی تک وہ پیار آنکھوں میں

دیارِ پاک کی جن کو ہوئی ہے دید نصیب

میں ڈھونڈ لوں گا وہ آنکھیں ہزار آنکھوں میں

سنائوں گا وہ کہانی حضورؐ کو جا کر

چھپائے بیٹھا ہوں جو اشک بار آنکھوں میں

ہے اعتماد بھی اقبال کو شفاعت پر

سزا کا خوف بھی ہے گناہ گار آنکھوں میں

دنیا میں جو فردوس عطا ہم کو ہوئی ہے

وہ شہر نبیؐ شہر نبیؐ ،شہر نبیؐ ہے

جو چیز بھی اس شہر سے منسوب ہوئی ہے

وہ کتنی بڑی ، کتنی بڑی، کتنی بڑی ہے

جو روح کو تسکین ہے اور دل کی تسلی

وہ ذکر نبیؐ ،ذکر نبیؐ ، ذکر نبیؐ ہے

دن رات یہاں ہوتی ہے انوار کی بارش

وہ کوئے نبیؐ ، کوئے نبیؐ ، کوئے نبیؐ ہے

انسان کے ہر نام سے جو نام بڑا ہے

وہ نام نبیؐ نام نبیؐ ، نام نبیؐ ہے

اﷲ نے سرکار کو خود پاس بلایا

کیا اوج نبیؐ ، اوج نبیؐ ، اوج نبیؐ ہے

جو صنف سخن جان ہے اقبال سخن کی

وہ نعتِ نبیؐ ، نعت نبیؐ نعت نبیؐ ہے ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

نعت میں کیسے کہوں انؐ کی رضا سے پہلے میرے ماتھے پہ پسینہ ہے ثنا سے پہلے

نور کا نام نہ تھا عالمِ امکاں میں کہیں

جلوۂ صاحب لو لاک لما سے پہلے

اُنؐ کا در وہ درِ دولت ہے جہاں شام و سحر

بھیک ملتی ہے فقیروں کو صدا سے پہلے

اب یہ عالم ہے کہ دامن کا سنبھلنا ہے محال

کچھ بھی دامن میں نہ تھا انؐ کی عطا سے پہلے

تم نہیں جانتے شاید میرے آقاؐ کا مزاج

اُنؐ کے قدموں سے لپٹ جاؤ سزا سے پہلے

چشم رحمت سے ملا اشک ندامت کا جواب

مشکل آسان ہوئی قصد دعا سے پہلے

میری آنکھیں میرا رستہ جو نہ روکیں اقبال

میں مدینے میں ملوں راہ نما سے پہلے ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ "آئینہ بھی ہے" سے منتخب کلام ۔۔۔۔۔۔۔۔۔۔۔۔۔۔۔۔۔۔۔۔۔۔۔

میں نے کچھ اور کہا آپ سے اور آپ نے کچھ اور سنا

مجھ میں لفظوں کو برتنے کا سلیقہ ہی نہیں ہے شاید جب بھی ملئے وہی شکوے وہی ماتھے پہ شکن رہتی ہے

آپ سے کوئی ملے آپ کا منشا ہی نہیں ہے شاید

میں نے تو پرسشِ احوال بھی کی اور مخاطب بھی ہوا

حسنِ اخلاق مگر آپ کا شیوہ ہی نہیں ہے شاید

بات اب منزلِ تشہیر تک آ پہنچی جستہ جستہ

اب بجز ترکِ تعلق کوئی رستہ ہی نہیں ہے شاید

آپ کچھ بھی کہیں ناقابلِ تردید حقیقت ہے یہ

آپ کو میری صداقت پر بھروسہ ہی نہیں ہے شاید

اب وہ احباب نہ ماحول نہ آداب نہ پرسش نہ سلام

اب تو محفل میں کوئی اپنا شناسا ہی نہیں ہے شاید

حاکم شہر پہ تنقید کا اقبالؔ نتیجہ معلوم

اور وہ یہ کہ تمھیں شہر میں رہنا ہی نہیں ہے شاید ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ یہ مری اَنا کی شکست ہے، نہ دوا کرو نہ دعا کرو جو کرو تو بس یہ کرم کرو مجھے میرے حال پہ چھوڑ دو

وہ جو ایک ترکشِ وقت ہے ابھی اُس میں تیر بہت سے ہیں

کوئی تیر تم کو نہ آ لگے میرے زخمِ دل پہ نہ یوں ہنسو

نہ میں کوہ کن ہوں، نہ قیس ہوں، مجھے اپنی جان عزیز ہے

مجھے ترکِ عشق قبول ہے، جو تمھیں یقینِ وفا نہ ہو

جو تمھارے دل میں شکوک ہیں تو یہ عہد نامے فضول ہیں

جو مرے خطوط ہیں پھاڑ دو، یہ تمھارے خط ہیں سمیٹ لو

جو کسی کو کوئی ستائے گا تو گلہ بھی ہونٹوں تک آئے گا

یہ تو اک اصول کی بات ہے، جو خفا ہے مجھ سے کوئی تو ہو

مجھے اب صداؤں سے کام ہے، مجھے خال و خد کی خبر نہیں

تو پھر اس فریب سے فائدہ یہ نقاب اب تو اُتار دو

مجھے اپنے فقر پہ ناز ہے، مجھے اس کرم کی طلب نہیں

میں گدا نہیں ہوں فقیر ہوں، یہ کرم گداؤں میں بانٹ دو

یہ فقط تمھارے سوال کا مرا مختصر سا جواب ہے

یہ گلہ نہیں ہے، خلوص ہے، مری گفتگو کا اثر نہ لو

یہ ادھورے چاند کی چاندنی بھی اندھیری رات میں کم نہیں

کہیں یہ بھی ساتھ نہ چھوڑ دے، ابھی روشنی ہے چلے چلو ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اک خطا ہم از رہِ سادہ دِلی کرتے رہے ہر تبسّم پر قیاسِ دوستی کرتے رہے

ایسے لوگوں سےبھی ہم مِلتے رہے دل کھول کر

جو وفا کے نام پر سوداگری کرتے رہے

خود اندھیروں میں بسر کرتے رہے ہم زندگی

دوسروں کے گھر میں لیکن روشنی کرتے رہے

سجدہ ریزی پائے ساقی پر کبھی ہم نے نہ کی

اپنے اشکوں سے علاجِ تشنگی کرتے رہے

اپنے ہاتھوں آرزوؤں کا گلا گھونٹا کئے

زندہ رہنے کے لئے ہم خود کُشی کرتے رہے

ہر طرف جلتے رہے،بُجھتے رہے جھُوٹے چراغ

اور ہم، سامانِ جشنِ تِیرَگی کرتے رہے

حالِ دل کہہ دیں کسی سے، بارہا سوچا مگر

اِس اِرادے کو ہمیشہ مُلتوی کرتے رہے

خود کو دیتے بھی رہے ترکِ تعلّق کا فریب!

اور درپردہ ، کسی کو یاد بھی کرتے رہے

اس طرح اقبال! گزری ہے ہماری زندگی

زہرِ غم پیتے رہے، اور شاعری کرتے رہے ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

گِلہ تو آپ سے ہے اور بے سبب بھی نہیں مگر اِرادۂ اظہار زیرِ لب بھی نہیں

میں چاہتا ہوں کہ اپنی زباں سے کچھ نہ کہوں

میں صاف گو ہوں، مگر اتنا بے ادب بھی نہیں

جفا کی طرح، مجھے ترکِ دوستی بھی قبول

ملال جب بھی نہ تھا مجھ کو، اور اب بھی نہیں

گزر گیا وہ طلب گاریوں کا دَور بخیر

خدا کا شُکر، کہ اب فرصتِ طلب بھی نہیں

مزاجِ وقت سے تنگ آ چکا ہے میرا ضمیر

مِرے اصول بدل جائیں تو عجب بھی نہیں

گئے دنوں کا فسانہ ہے اب ہمارا وجود

وہ مفلسی بھی نہیں ہے، وہ روز و شب بھی نہیں

جواب دوں گا میں، کچھ مجھ سے پوچھ کر دیکھو

ابھی میں ہوش میں ہوں ایسا جاں بہ لب بھی نہیں

حسب نسب کی جو پوچھو تو شجرہ پیش کروں

کتاب کوئی نہیں ہے، مِرا لقب بھی نہیں ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

یہ نگاہِ شرم جھُکی جھُکی، یہ جبینِ ناز دھُواں دھُواں مِرے بس کی اب نہیں داستاں، مِرا کانپتا ہے رُواں رُواں

یہ تخیّلات کی زندگی، یہ تصوّرات کی بندگی

فقط اِک فریبِ خیال پر، مِری زندگی ہے رواں دواں

مِرے دل پہ نقش ہیں آج تک، وہ با احتیاط نوازشیں

وہ غرور و ضبط عیاں عیاں، وہ خلوصِ ربط نہاں نہاں

نہ سفر بشرطِ مآل ہے، نہ طلب بقیدِ سوال ہے

فقط ایک سیریِ ذوق کو، میں بھٹک رہا ہوں کہاں کہاں

مِری خلوتوں کی یہ جنّتیں کئی بار سج کے اُجڑ گئیں

مجھے بارہا یہ گمان ہوا، کہ تم آرہے ہو کشاں کشاں ۔۔۔۔۔۔۔۔۔۔۔۔۔۔۔۔۔۔۔۔۔۔

ہم نے مانا اس زمانے میں ہنسی بھی جرم ہے لیکن اس ماحول میں افسردگی بھی جرم ہے

دشمنی تو خیر ہر صورت میں ہوتی ہے گناہ

اک معین حد سے آگے دوستی بھی جرم ہے

ہم وفائیں کر کے رکھتے ہیں وفاؤں کی امید

دوستی میں اس قدر سوداگری بھی جرم ہے

اس سے پہلے زندگی میں ایسی پابندی نہ تھی

اب تو جیسے خود وجودِ زندگی بھی جرم ہے

آدمی اس زندگی سے بچ کے جائے بھی کہاں

مے کشی بھی جرم ہے اور خودکشی بھی جرم ہے

سادگی میں جان دے بیٹھے ہزاروں کوہ کن

آدمی سوچے تو اتنی سادگی بھی جرم ہے

کتنی دیواریں کھڑی ہیں ہر قدم ہر راہ پر

اور ستم یہ ہے کہ شوریدہ سری بھی جرم ہے

ایک ساغر کے لئے جو بیچ دے اپنا ضمیر

ایسے رندوں کے لئے تشنہ لبی بھی جرم ہے

اپنی بے نوری کا ہم اقبال ماتم کیوں کریں

آج کے حالات میں دیدہ وری بھی جرم ہے ۔۔۔۔۔۔۔۔۔۔۔۔۔۔۔۔۔۔۔۔۔۔۔۔

یہ مری انا کی شکست ہے، نہ دعا کرو، نہ دوا کرو جو کرو تو اتنا کرم کرو، مجھے میرے حال پہ چھوڑ دو

یہ جو ایک ترکشِ وقت ہے، ابھی اس میں تیر بہت سے ہیں

کوئی تیر تم کو نہ آ لگے ، مرے حالِ دل پہ نہ یوں ہنسو

میں نہ قیس ہوں، نہ ہوں کوہکن، مجھے اپنی جان عزیز ہے

مجھے ترکِ عشق قبول ہے جو تمھیں یقینِ وفا نہ ہو

جو تمھارے دل میں شکوک ہیں تو یہ عہد نامے فضول ہیں

یہ تمھارے خط ہیں سنبھال لو، جو مرے خطوط ہوں پھاڑ دو

جو کوئی کسی کو ستائے گا تو گلہ بھی ہونٹوں تک آئے گا

یہ تو اک اُصول کی بات ہے جو خفا ہو مجھ سے تو کوئی ہو

۔۔۔۔۔۔۔۔۔۔۔۔۔۔۔۔۔۔۔۔۔۔۔

وہ موجِ تبسّم شگفتہ شگفتہ ، وہ بھولا سا چہرہ کتابی کتابی وہ سُنبل سے گیسو سنہرے سنہرے ، وہ مخمور آنکھیں گلابی گلابی

کفِ دست نازک حنائی حنائی ، وہ لب ہائے شیریں شہابی شہابی

وہ باتوں میں جادو اداؤں میں ٹونا ، وہ دُزدیدہ نظریں عقابی عقابی

کبھی خوش مزاجی ، کبھی بے نیازی، ابھی ہوشیاری ، ابھی نیم خوابی

قدم بہکے بہکے نظر کھوئی کھوئی ، وہ مخمور لہجہ شرابی شرابی

نہ حرفِ تکلّم ، نہ سعیِ تخاطب ، سرِ بزم لیکن بہم ہم کلامی

ادھر چند آنسو سوالی سوالی ، اُدھر کچھ تبسّم جوابی جوابی

وہ سیلابِ خوشبو گلستاں گلستاں ، وہ سروِ خراماں بہاراں بہاراں

فروزاں فروزاں جبیں کہکشانی ، درخشاں درخشاں نظر ماہتابی

نہ ہونٹوں پہ سرخی ، نہ آنکھوں میں کاجل ، نہ ہاتھوں میں کنگن ، نہ پیروں میں پائل

مگر حُسنِ سادہ مثالی مثالی ، جوابِ شمائل فقط لاجوابی

وہ شہرِ نگاراں کی گلیوں کے پھیرے ، سرِ کوئے خوباں فقیروں کے ڈیرے

مگر حرفِ پُرسش ، نہ اِذنِ گزارش ، کبھی نامُرادی کبھی باریابی

یہ سب کچھ کبھی تھا ، مگر اب نہیں ہے کہ آوارہ فرہاد گوشہ نشیں ہے

نہ تیشہ بدوشی ، نہ خارہ شگافی ، نہ آہیں ، نہ آنسو ، نہ خانہ خرابی

کہ نظروں میں اب کوئی شیریں نہیں ہے ، جدھر دیکھیئے ایک مریم کھڑی ہے

نجابت ساپا ، شرافت تبسّم ، بہ عصمت مزاجی ، بہ عفّت مآبی

جو گیسو سنہرے تھے اب نُقرئی ہیں ، جن آنکھوں میں جادو تھا ، اب با وضو ہیں

یہ پاکیزہ چہرے ، یہ معصوم آنکھیں ، نہ وہ بے حجابی ، نہ وہ بے نقابی

وہ عشقِ مجازی حقیقت میں ڈھل کر تقدّس کی راہوں پہ اب گامزن ہے

جو حُسنِ نگاراں فریبِ نظر تھا ، فرشتوں کی صورت ہے گردوں جنابی

وہ صورت پرستی سے اُکتا گیا ہے ، خلوصِ نظر اور کچھ ڈھونڈتا ہے

نہ موجِ تبسّم ، نہ دستِ حنائی ، نہ مخمور آنکھیں گلابی گلابی ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

وہ یوں ملا کے بظاہر خفا خفا سا لگا وہ دوسروں سے مگر مجھ کو کچھ جدا سا لگا

مزاج اُس نے نہ پوچھا مگر سلام لیا

یہ بے رخی کا سلیقہ بھی کچھ بھلا سا لگا

وہ جس کی کم سُخنی کو غرور سمجھا گیا

میری نگاہ کو وہ پیکرِ حیا سا لگا

میں اپنے کرب کی روداد اُس سے کیا کہتا

خود اُس کا دل بھی مجھے کچھ دُکھا دُکھا سا لگا

غبارِ وقت نے کچھ یوں بدل دیئے چہرے

خود اپنا شہر بھی مجھ کو نیا نیا سا لگا

گھُٹی گھُٹی سی لگی رات انجمن کی فِضا

چراغ جو بھی جلا کچھ بجھا بجھا سا لگا

جو ہم پہ گزری ہے شائد سبھی پہ گزری ہے

فسانہ جو بھی سُنا کچھ سُنا سُنا سا لگا

میں گھر سے چل کے اکیلا یہاں تک آیا ہوں

جو ہمسفر بھی ملا ، کچھ تھکا تھکا سا لگا

کچھ اس خلوص سے اُس نے مجھے کہا اقبال

خود اپنا نام بھی مجھ کو بہت بڑا سا لگا