کل 31 اکتوبر خوبصورت لب و لہجے کے معروف شاعر وفا حجازی کا یومِ وفات ہے

------------------------------------------------------------- سال پیدائش ۔ امرتسر ۔ نامعلوم تاریخ وفات ۔ کبیروالا ۔ 31 اکتوبر 1984ء کبیروالا کی سرزمین ھر دور مین ادبی لحاظ سے ھمیشہ زرخیز رھی ھے ۔ بیدل حیدری ، خادم رزمی اور وفا حجازی اپنے دور کے اردو اور پنجابی ادب کی نامور شخصیات تھے ۔ طالب بٹالوی ، قمر رضا شہزاد ، فیصل ھاشمی ساغر مشہدی ، حسنین اصغر تبسم اور منیر راھی جیسے معروف شاعروں کا تعلق بھی اسی سرزمین کبیروالا سے ھے ۔ وفا حجازی کا اصل نام عطاء الرحمٰن تھا ۔ آپ کی والدہ محترمہ کا تعلق حجاز سعودی عرب سے تھا ۔ آپ کے والد کا نام فضل الرحمٰن ھے ۔آپ امرتسر میں پیدا ھوئے اور ابتدائی تعلیم وھیں حاصل کی ۔ تقسیم برصغیر کے بعد آپ کا خاندان پاکستان منتقل ھو گیا ۔ شروع میں آپ کے خاندان نے جہلم میں سکونت اختیار کی ۔ شادی کے بعد آپ کبیروالا منتقل ھو گئے ۔ کبیروالا کی ادبی فضا انہیں ایسی راس آئی کہ پھر وہ یہیں کے ھو رھے ۔ آپ حکمت کے شعبہ سے وابستہ تھے شاعری کا شوق شروع ھی سے تھا اس لئے وفا تخلص رکھا ۔ حجاز سے تعلق ھونے کی وجہ سے حجازی مشہور ھوئے ۔ تو پھر یہ نام کا حصہ ھی بن گیا ۔ وفا حجازی کی ساری زندگی حرف و معنی کی آبیاری میں صرف ھوئی ۔ سادہ لفطوں میں اپنی بات کو شعر میں بیان کرنے میں ان کا کوئی ثانی نہیں تھا ۔ وفا حجازی کیونکہ ایک درویش منش انسان تھے اس لئے کبھی ذاتی نمود نمائش کی طرف توجہ نہیں دیتے تھے ۔ ان کی شاعری کا مجموعہ بھی ان کی وفات کے بعد شائع ھوا ۔ ابھی بھی ان کے کلام کا بہت سا حصہ شائع نہیں ھوا ۔ جس کی اشاعت کیلئے ان کے کچھ دوست احباب اور شعراء کوشش کر رھے ھیں ۔ وفاحجازی آخری عمر میں کافی علیل رھے اور اسی حالت میں 31 اکتوبر 1984ء کو نشتر ھسپتال ملتان میں انتقال فرما گئے ۔ ٭٭٭٭٭٭٭٭٭٭٭٭٭٭٭٭٭٭٭٭ کتابیات ۔۔۔۔۔۔۔۔۔۔۔۔۔۔ میلے جسموں کی چاندنی ٭٭٭٭٭٭٭٭٭٭٭٭٭٭٭٭٭٭٭٭ منتخب کلام ۔۔۔۔۔۔۔۔۔۔۔۔۔۔۔ پچھلے پہر کا سناٹا جب زھر فضا میں گھولے گا کون کسی سے بات کرے گا ، کون کسی سے بولے گا اک نووارد کی آھٹ ، پھر من کے تار ھلائے گی پسِ منظر میں ڈولتا سایہ ، آج دریچہ کھولے گا رات کے راھی کی پلکیں ھیں بھیگی بھیگی شبنم سے اس حالت میں دن نکلا تو کرنوں کا دل ڈولے گا رفتہ رفتہ میرے رخ سے زردی بھی اڑ جائے گی جتنی دیر میں تم آؤ گے ۔ سونا مٹی ھو لے گا اہلِ وفا کو جنبشِ لب کی کون اجازت دیتا ھے دور سے تجھ کو دیکھ کے کوئی چپکے چپکے رو لے گا ۔۔۔۔۔۔۔۔۔۔۔۔۔۔۔۔۔۔۔۔۔۔۔۔ فصلَ جنوں میں زنجیروں کا حلقہ دیکھنے والا تھا دیوانے جب گرمِ سفر تھے صحرا دیکھنے والا تھا وہ مٹی کا کچا گھڑا تھا لے ڈوبا جو مانجھی کو ورنہ دریا پار کا یارو میلہ دیکھنے والا تھا تو کہ میری خاطر ایک ذرا سا موڑ نہ کاٹ سکا میں تو روزِ ازل سے تیرا رستہ دیکھنے والا تھا شیشے ، پتھر ، طوق ، سلاسل ، زنداں ، مقتل ، دار ، صلیب اھلِ جنوں نے کل جو کھینچا ، نقشہ دیکھنے والا تھا رات کا سینہ دھڑک اٹھا تھا جس کی روشن لہروں سے ٹوٹنے والے اس تارے کا شعلہ دیکھنے والا تھا شہرِ وفا کی ساری کرنیں پھوٹ رھی تھین ماتھے پر مقتل میں اس نووارد کا چہرہ دیکھنے والا تھا ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ لے کے پلکوں پہ ستاروں کے الم آتے ھیں آج کل جشن کی صورت تیرے غم آتے ھیں رہ میں کس کی ملاقات کا سورج ابھرا قافلے نغمہ بہ لب ، ساز بہ دم آتے ھیں میری آنکھوں میں تو پھیلا ھے بیاباں کا غبار لوگ کیوں شہر سے بادیدۂ نم آتے ھیں بس وھیں رات کی ترتیب بگڑ جاتی ھے رخِ زیبا پہ جہاں زلف کے خم آتے ھیں سارا ماحول صلیبوں میں بدل جاتا ھے جب کبھی تیرے مضافات میں ھم آتے ھیں منزلِ صبحِ طرب ان کا مقدر ھے وفا جن کے دامن پہ ستاروں کے قدم آتے ھیں ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ایک پتہ سا جو خون میں تر لگتا ھے ڈار سے بچھڑی ھوئی کونج کا پر لگتا ھے پھر ھوا جھومی ھے راھوں میں شجر جھومے ھیں پھر مجھے آج وہ مصروفِ سفر لگتا ھے میرے ھونٹوں پہ تبسم بھی گلہ ھو جیسے آپ کی آنکھ میں آنسو بھی گہر لگتا ھے کوئی پتھر سے ھے مانوس کوئی شیشے سے مجھ کو ھر شخص یہاں اہلِ ھنر لگتا ھے تم نے پھینکا ھے جسے زیست کی پچھلی صف میں سب سے اونچا تو اسی شخص کا سر لگتا ھے جس پہ الزام ھے اب کور نگاھی کا وفا وہ تو اک حلقۂ اربابِ نظر لگتا ھے ۔۔۔۔۔۔۔۔۔۔۔۔۔۔۔۔۔۔۔۔۔۔۔ خطرے میں خود پہرے دار کی جان نہ ھو گھر ھو لیکن اتنا عالی شان نہ ھو اور تو سارے دکھ مجھ کو منظور وفا مولا میرا بیٹا نافرمان نہ ھو ۔۔۔۔ !