اگست 26  : کو ممتاز شاعر " غم کے شاعر" فانی بدایونی کا یومِ پیدائش ہے

از: ابوالحسن علی بھٹکلی ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ مختصر تعارف ۔۔۔۔۔۔۔۔۔۔۔۔۔۔۔۔۔۔۔۔ اصل نام شوکت علی والد کا نام محمد شجاعت علی خاں مقام ولادت: قصبہ اسلام نگر ضلع بدایوں ۔ تاریخ ولادت : 13 ستمبر 1879ء ۔ درس و تدریس کی بسم اللہ پانچ برس کی عمر میں ہوئی اور 1892ء تک تعلیم قدیم کے اصول پر عربی،فارسی کے میدان میں تحصیل علم کرتے رہے۔ 1901ء میں بی اے کا ڈپلوما لیا ۔او 1908ء میں وکالت ہائی کورٹ کے ساتھ ایل ایل بی کی ڈگری لی ۔ انٹرنس کی سند گورنمنٹ سکول بدایوں سے اور ایف اے اور بی اے کی بریلی کالج سے حاصل کی ۔ سلسلہ تعلیم کا اختتام ایل ایل بی کی ڈگری پر علی گڑھ کالج میں ہوا ۔تھصیل علم کی منازل جس آسانی اور تیز روی کے ساتھ طے کیں اس سے خداداد ذہانت اور طباعی کا بین ثبوت ملتا ہے ۔طبع موزوں میں پیدائش کے ساتھ صناعِ قدرت سے ودیعت ہویئ تھی ۔ ذوقِ سلیم آگے چل کر گھٹی میں دیا گیا ۔ 1890ء میں سب سے پہلی غزل موزوں کی ۔ استاد مکتب قدیمہ کے سامنے زانوۓ ادب تہ کرنے کے عالم میں ہی طبع موزوں میں ہیجان پیدا ہو چلا تھا جو بلا کسی اصلاح و تلمذ کے " الشعراء تلامیذ الرحمٰن " کے ثبوت میں کُھل کھیلا ۔ سیپارہ دل میں الف لام میم کی تلاوت کی تلاوت میں ایک وجدانی کیفیت تھی جس کو کسی رہبر و راہنما کا رہینِ مشورہ نہ ہونا پڑا ۔1898ء میں پہلا دیوان مکمل کیا جا نامساعدتِ طبع آزاد کی بدولت اشاعت سے پیشتر ہی ضائع ہو گیا ۔ 1901ء و 1902ء میں شیکسپیر کےڈرامہ Much Ado About Nothing اور ملٹن کے "کومس" کو ہندوستانی لباس پہنایا مگر ان دونوں کا حشر بھی وہی ہوا جو دیوانِ اول کا ہوا تھا ۔ لباسِ مشرقی ان تالیفات کا کفن ثابت ہوا ۔ دوسرا دیوان 1906ء میں وجود میں آیا اور عنایاتِ احباب کا مرجع رہ کر غالباً پہلے دیوان کی تلاش میں یہ بھی ملکِ عدم کو چل بسا۔ ان ناکامیوں کے تجربہ تلخ نے جنابِ فانیؔ کو عرصہ دراز کے لۓ ساکت کر دیا ۔ اور بظاہر مشق سخن سے دستکش ہو گۓ۔ لذتِ درد و عادتِ فریاد کا خون منہ کو لگ چکا تھا ۔ زبانِ قلم بریدہ ہونے پر بھی گنگ نہ تھی ۔ پرانا چسکا رہ رہ کر طبع موزوں کے چٹکیاں لیتا تھا ۔ ہیجان تخلیات گاہے ماہے اظہارِ کیفیت پر آمادہ کرتا تھا ۔ 1917ء سے از سر نو نالہ و فریاد لب تک آ کر نغمہ نواز ہونے لگے۔ ۔۔۔۔۔ 26 اگست 1941ء کو فانیؔ اس دنیاۓ فانی سے رخصت ہوۓ۔ قاضی عبالغفارصاحب نے کہا تھا کہ " انتقال سے تقریباً ایک سال پہلے ایک دن شام کو میرے پاس آۓ مسکراتے ہوۓ اپنی جیب سے ایک پرچہ نکالا کہنے لگے بھئی قاضی! بس ایک چیز سنانے آیا ہوں ۔ انتظار کر رہا تھا کہ کب یہ لکھی جاۓ۔ آخر آج صبح یہ چار مصرعے موزوں ہو گۓ ! میں نے کہا آخر ہے کیا یہ کہ تم صرف اس کے سنانے کے لۓ گھر سے چل کر آ گۓ ۔ ورنہ تو ہم تمہاری خوشامدیں کیا کرتے ہیں اور تم دو مصرعے نہیں سناتے ! کہنے لگے ۔ ذرا سن تو لو ! یہ میری تاریخ وفات ہے ۔ او از جہان گزشت کہ آخر خدا نہ بود او این چنین بزیست کہ گوئی خدا نہ داشت (آخر وہ جہاں سے کوچ کر گیا کہ آخر بندہ تھا کوئی خدا تو تھا نہیں وہ دنیا میں اِس طور سے جیا جیسے اُس کا کوئی خدا ھی نہ تھا) طغیانِ ناز بِین کہ بہ لوحِ مزارِ او ثبت است سالِ رخصتِ فانیؔ خدا نداشت (یہ طرفہ تماشا دیکھو کہ اُس کے لوحِ مزار پر اُس کی تاریخِ وفات کی جگہ یہ درج ھے کہ فانیؔ کا کوئی خدا نہیں تھا) کہنے لگے بس کچھ نہ کہو! یہ بالکل صحیح تاریخ ہے ۔ میں نے کہا ظالم آخر یہ کہہ کیا دیا ۔ کہنے لگے " خدا نداشت" سے گھبرا گۓ اور " طغیانِ ناز" کو نہیں دیکھتے ۔ وفات کے بعد جب یہ مسئلہ پیش تھا کہ اس بے سرو ساماں کی قبر کیوں کر بنے اور لوحِ مزار پر کیا لکھا جاۓ تو کم نظر احباب بہت گھبراۓ ہوۓ تھے کہ کہیں خود ان کی کہی تاریخ وفات نہ لکھوا دی جاۓ ۔۔۔۔۔ ان بیچاروں نے کبھی اس طرف نظر ہی نہ کی "خدا نداشت" کے طنز کا مخطب اصلی کون تھا !۔۔۔ تاریخیں لکھنے والوں نے اچھی اچھی تاریخیں لکھیں لیکن شاعرِ غم اپنی وضع داری کو آخر دم تک نبھا گیا ۔ ۔۔ ساری عمر اس نے " آب بیتی" لکھی اور آخر دم بھی اسی پر اپنی شاعری ختم کر گیا۔" ۔۔۔۔۔۔۔۔ منتخب کلام ۔۔۔۔۔۔۔۔۔۔۔۔۔۔ چند اشعار ۔۔۔ ہڈیاں کئی ہیں لپٹی ہوئی زنجیروں میں لۓ جاتے ہیں جنازہ ترے دیوانے کا ۔۔۔۔۔۔۔ اثر پابند کبھی بیتابی نہیں تو ضبط بھی کیوں ہو؟ بلا سے حالِ دل کچھ بھی سہی ناگفتنی کیوں ہو؟ ۔۔۔۔۔۔۔۔۔۔۔۔۔۔ بہار آئی کہ یا رب عید آئی اہلِ زنداں کو گریباں نے گلے لپٹا لیا ہے بڑھ کے داماں کو ۔۔۔۔۔۔۔۔۔۔۔۔۔ شکوہ منظور نہیں تذکرہ عشق نہ  چھیڑ کہ وہ در پردہ مرا حالِ پریشاں نکلا ۔۔۔۔۔۔۔۔۔۔۔۔۔۔۔ فانیؔ دواۓ دردِ جگر زہر تو نہیں کیوں ہاتھ کانپتا ہے مرے چارہ ساز کا ۔۔۔۔۔۔۔۔۔۔۔۔۔۔۔۔ دے تیرا حسنِ تغافل جسے جو چاہے فریب ورنہ تو اور جفاؤں پر پشیماں ہوتا ۔۔۔۔۔۔۔۔۔۔۔۔۔۔۔ مری اک عمر فانیؔ نزع کے عالم میں گزری ہے محبت نے مری رگ رگ سے کھینچا ہے لہو برسوں ۔۔۔۔۔۔۔۔۔۔۔۔۔۔۔ چمن سے رخصتِ فانیؔ قریب ہے شاید کہ آج بوۓ کفن دامنِ بہار میں ہے ۔۔۔۔۔۔۔۔۔۔ خاک فانیؔ کی قسم ہے تجھے اے دشتِ جنوں کس سے سیکھا ترے ذروں نے بیاباں ہونا ۔۔۔۔۔۔۔۔۔۔۔۔ چلے بھی آؤ وہ ہے قبر ِ فانی دیکھتے جاؤ تم اپنے مرنے والے کی نشانی دیکھتے جاؤ ۔۔۔۔۔۔۔۔۔۔۔۔۔ سنے جاتے نہ تھے تم سے مرے دن رات کے شکوے کفن سرکائو میری بے زبانی دیکھتے جاؤ ۔۔۔۔۔۔۔۔۔۔۔۔ دیکھ فانی وہ تری تدبیر کی میت نہ ہو اک جنازہ جا رہا ہے دوش پر تقدیر کے ۔۔۔۔۔۔۔۔۔ شب فرقت کٹی یا عمر فانی اجل کے ساتھ آمد ہے سحر کی ۔۔۔۔۔۔۔۔۔۔۔ مختصر قصہ غم یہ ہے کہ دل رکھتا ہوں راز کونین خلاصہ ہے اس افسانے کا ۔۔۔۔۔۔۔۔۔۔۔۔ زیست کا حاصل بنایا دل جو گویا کچھ نہ تھا غم نے دل کو دل بنا یا ورنہ کیاتھا کچھ نہ تھا ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ تم نے دیکھا ہے کبھی گھر کو بدلتے ہوئے رنگ آؤ دیکھو نا ں تماشا میر ے غم خانے کا ۔۔۔۔۔۔۔۔۔۔۔ منتخب غزلیں ۔۔۔۔۔ کچھ اس طرح تڑپ کر میں بے قرار رویا دشمن بھی چیخ اُٹھا ، بے اختیار رویا کیا اُس کو بے قراری یاد آگئی ہماری مل مل کے بجلیوں سے ابر بہار ، رویا فانی کو یہ جنوں ہے یا تیری آرزو ہے کل نام لے کے تیرا بے اختیار رویا ۔۔۔۔۔۔۔۔۔۔۔۔۔۔۔۔۔۔۔ یاں ہوش سے بیزار ہوا بھی نہیں جاتا اس بزم میں ہشیار ہوا بھی نہیں جاتا کہتے ہو کہ ہم وعدہ پُرسش نہیں کرتے یہ سُن کے تو بیمار ہوا بھی نہیں جاتا دشوارئ انکار سے طالب نہیں ڈرتے یوں سہل تو اقرار ہوا بھی نہیں جاتا آتے ہوۓ عیادت کو تو کرتے ہیں نصیحت احباب سے غمخوار ہوا بھی نہیں جاتا جاتے ہوۓ کھاتے ہو مری جان کی قسمیں اب جان سے بیزار ہوا بھی نہیں جاتا غم کیا ہے اگر منزلِ جاناں ہے بہت دور کیا خاکِ رہ ِ یار ہوا بھی نہیں جاتا دیکھا نہ گیا اُس سے تڑپنتے ہوۓ دل کو ظالم سے جفاکار ہوا بھی نہیں جاتا یہ طرفہ ستم ہے کہ ستم بھی ہے کرم بھی اب خوگرِ آزار ہوا بھی نہیں جاتا ۔۔۔۔۔۔۔۔۔۔۔۔۔۔۔۔۔ خلق کہتی ہے جسے دل ترے دیوانے کا ایک گوشہ ہے یہ دنیا اُسی ویرانے کا اک معمہ ہے سمجھنے کا نہ سمجھانے کا زندگی کاہے کو ہے خواب ہے دیوانے کا حُسن ہے ذات مری عشق  صفت ہے میری ہوں تو میں شمع مگر بھیس ہے پروانے کا کعبہ کو دل کی زیارت کے لۓ جاتا ہوں آستانہ ہے حرم میرے صنم خانے کا مختصر قصہء غم یہ ہے کہ دل رکھتا ہوں رازِ کونین خلاصہ ہے اس افسانے کا زندگی بھی تو پشیماں ہے یہاں لا کے مجھے ڈھونڈتی ہے کوئی حیلہ مرے مر جانے کا تم نے دیکھا ہے کبھی گھر کو بدلتے ہوۓ رنگ آؤ دیکھو نہ تماشا مرے غم خانے کا دل سے پہنچی تو ہیں آنکھوں میں لہو کی بوندیں سلسلہ شیشہ سے ملتا تو ہے پیمانے کا ہڈیاں ہیں کئی لپٹی ہوئی زنجیروں میں لۓ جاتے ہیں جنازہ کسی دیوانے کا وحدتِ حُسن کے جلووں کی یہ کثرت اے عشق دل کے ہر ذرہ میں عالم ہے پری خانے کا چشمِ ساقی اثرِ مے سے نہیں ہے گُلرنگ دل مرے خون سے لبریز ہے پیمانے کا لوح دل کو غمِ الفت کو قلم کہتے ہیں کُن ہے اندازِ رقم حُسن کے افسانے کا ہر نفس عمرِ گذشتہ کی ہے میت فانیؔ زندگی نام ہے مر مر کے جۓ جانے کا قطعہ ہم نے چھانے ہیں بہت دیر و حرم کی گلیاں کہیں پایا نہ ٹھکانا ترے دیوانے کا کس کی آنکھیں دمِ آخر مجھے یاد آیئ ہیں دل مرقع ہے چھلکتے ہوۓ پیمانے کا کہتے ہیں کیا ہی مزے کا ہے فسانہ فانیؔ آپ کی جان سے دور آپ کے مر جانے کا