ستمبر 20 : آج خداۓ سخن میر تقی میرؔ کی برسی ہے

از: ابوالحسن علی بھٹکلی ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ میرؔ کا انتقال 20 ستمبر 1810ء میں لکھنو میں ہوایوں اُن کو اس جہان ِ فانی سے گزرے 200 برس سے زیادہ کا عرصہ بیت چکا تاہم اُردو شاعری میں اُن کی عظمت کااعتراف آج بھی کیاجاتا ہے **** میر تقی، میرؔ تخلص ، آگر ہ میں 1723ء میں پیدا ہوئے۔ اُن کے والد کا نام محمد علی تھا، لیکن علی متقی کے نام سے مشہور ہوئے اور وہ زیادہ تر گریہ و استغراق اور کیف مجذوبی میں گم رہتے تھے ۔ میرؔ نے ابتدائی تعلیم والد کے دوست سید امان ا للہ سے حاصل کی۔میرؔ کے سید ہونے کے سلسلہ میں کچھ لوگوں نے تامل کیا ہے، لیکن مولانامحمد حسین آزادؔ نے میرؔ ہی کے کلام سے استناد کرتے ہوئے انھیںسید تسلیم کیا ہے اور اس باب کو یہیں پر ختم کر دیا ہے۔ مولانا آزادؔ لکھتے ہیں ’’پھر بھی اتنا کہنا واجب سمجھتا ہوں کہ اُن کی مسکینی ، غربت،صبر و قناعت، تقوی ، طہارت ،محضر بن کے ادائے شہادت کرتے ہیں کہ سیادت میں شبہ نہ کرنا چاہیے ورنہ زمانے کا کیا ہے ،کس کس کو کیا نہیں کہا ہے، اگر وہ سید نہیں ہوتے تو خود کیوں کہتے‘‘: پھرتے ہیں میرؔ خوار کوئی پوچھتا نہیں اس عاشقی میں عزتِ سادات بھی گئی میرؔ ابھی نو برس کے تھے کہ اُن کے اتالیق سید امان اللہ چل بسے ،اُن کے بعد اُن کے والد نے تعلیم و تربیت شروع کی، مگر چند ہی ماہ بعد اُن کا بھی انتقال ہو گیا۔ یہاں سے میرؔ کی زندگی میں رنج و الم کے طویل باب کی ابتدا ہوئی۔والد کی وفات کے بعد میرؔ دلّی چلے گئے اور اپنی زندگی کا بڑا عرصہ وہیں گزارا اور کئی بار اس شہر کو اُجڑتے دیکھا۔ انھوں نے حالات اور واقعات کی تصویرکشی کرتے ہوئے ایسے شاہکار تخلیق کیے، جو نہ صرف اُردو زبان کی قدر و منزلت میں اضافے کا باعث بنے بل کہ خدائے سخن میر تقی میرؔکا نام بھی صدیوں کے لیے زندہ ٔ جاوید ہوگیا۔ میرؔ نے دلّی کے اُجڑنے کی المناک داستاں کا اظہار کچھ یوں کیا ہے: دلّی جو ایک شہر تھا عالم میں انتخاب رہتے تھے منتخب ہی جہاں روزگار کے جس کو فلک نے لوٹ کے ویران کر دیا ہم رہنے والے ہیں اسی اُجڑے دیار کے میر تقی میرؔ ایک ایسے عہد میں پیدا ہوئے، جو سیاسی ، سماجی ، ملکی اور معاشی اعتبار سے سخت انتشار اور افراتفری کا دَور تھا۔ مغل مرکز کمزور پڑ چکا تھا۔ ہندوستان کے بہت سے صوبے خود مختار ہو چکے تھے پورا ملک لوٹ ما ر کا شکار تھا۔ بیرونی حملہ آور آئے دن حملے کرتے تھے او ر عوام و خواص کو تباہ و برباد کرکے رکھ دیتے۔ لوگ بھوکے مرنے لگے اور دولت لٹنے سے اقتصادی بدحالی کا دَور شروع ہوا۔میرؔ اپنے اُس دَور کے احساس زوال اور انسانی الم کے مظہر ہیں۔اُن کی شاعری اس تما م شکست و ریخت کے خلاف ایک غیر منظم احتجاج ہے۔ میرؔ کے تصورِ غم کے بارے میں ڈاکٹر سید عبداللہ فرماتے ہیں ’’ میرؔ کا سب سے بڑا مضمون شاعری اُن کا غم ہے۔ غم و اَلم میر ؔکے مضامین شاعری سب سے زیادہ اہمیت حاصل ہے۔ یہ غم میرؔ کا ذاتی غم بھی تھا اور یہی انسان کی ازلی اور ابدی تقدیر کا غم بھی تھا۔ یہ سارے غم میرؔ کی شاعری میں جمع ہوگئے ہیں‘‘۔بقول میرؔ: مجھ کو شاعر نہ کہو میرؔ کہ صاحب میَں نے درد و غم کتنے کیے جمع تو دیوان کیا ………………… چشم رہتی ہے اب پر آب بہت دل کو میرے ہے اضطراب بہت ………………… مستقل روتے رہیے تو بجھے آتش دل ایک دو اشک تو اور آگ لگا دیتے ہیں بابائے اُردو مولوی عبدالحق،میرؔ کے بارے میں لکھتے ہیں: ’’ اُن کا ہر شعر ایک آنسو ہے اور ہر مصرع خون کی ایک بوند ہے‘‘۔ ایک اور جگہ کچھ اس طرح رقمطراز ہیں: ’’ انھوں نے سوز کے ساتھ جو نغمہ چھیڑا ہے، اس کی مثال دنیائے اُردو میں نہیں ملتی‘‘۔میرؔ کا تصور ِغم تخیلی اور فکری ہے، یہ قنوطیت پیدا نہیں کرتا۔مجنوں گورکھپوری ،میرؔ کے تصوراتِ غم سے بحث کرتے ہوئے لکھتے ہیں:’’میرؔ نے غمِ عشق اور اس کے ساتھ غمِ زندگی کو ہمارے لیے راحت بنا دیا ہے۔ وہ درد کو ایک سرور اور اَلم کو ایک نشاط بنا دیتے ہیں۔ میر ؔکے کلام کے مطالعہ سے ہمارے جذبات و خیالات اور ہمارے احساسات و نظریات میں وہ ضبط اور سنجیدگی پیدا ہوتی ہے، جس کو صحیح معنوں میں تحمل کہتے ہیں‘‘: ہر صبح غموں میں شام کی ہے میَں نے خونابہ کشی مدام کی ہے میَں نے یہ مہلت کم کہ جس کو کہتے ہیں عمر مر مر کے غرض تمام کی ہے میَں نے میرؔ کا دَور شدید ابتری کا دَور تھا۔ زندگی کے مختلف دائروں کی اقدار کی بے آبروئی ہو رہی تھی۔ انسانی خون کی ارزانی ، دنیا کی بے ثباتی اور ہمہ گیرانسانی تباہی نے انسانوں کو بے حد متاثر کیا۔ میرؔ اس تباہی کے محض تماشائی نہ تھے بل کہ وہ خود اس تباہ حال معاشرہ کے ایک رکن تھے، جو صدیوں کے لگے بندھے نظام کی بردبادی سے تسبیح کے دانوں کی طرح بکھر کر رہ گیا تھا اوراب اس کو جوڑ ممکن نہ رہا تھا۔ میرؔ نے اس ماحول کے اثرات شدت سے محسوس کیے ہیں۔ اُن کی غزلوں میں اس تباہی کے نقوش ملتے ہیں۔ لٹے ہوئے نگروں ، شہروں اور اجڑی ہوئی بستیوں کے حالات ، بجھے ہوئے دلوں کی تصویریں، زمانے کے گرد و غبار کی دھندلاہٹیں ،تشبیہوں اور استعاروں کی شکل میں میرؔ کے ہاں موجود ہیں: روشن ہے اس طرح دل ویراں میں داغ ایک اُجڑے نگر میں جیسے جلے ہے چراغ ایک ………………… دل کی ویرانی کا کیا مذکور یہ نگر سو مرتبہ لوٹا گیا اس غم و الم کے عالم کے باوجود میرؔ کی شاعری میں بلند حوصلگی بھی ہے۔ وہ سپاہیانہ دَم خم رکھتے ہیں، فوجی سازو سامان کے استعاروں میں مطلب ادا کرکے زندگی کا ایسا احساس دلاتے ہیں ،جس میں بزدلی بہرحال عیب ہے۔ وہ رویہ جسے اہل تذکرہ بے دماغی یا بد دماغی کہتے ہیں ،وہ دراصل وہ احتجاجی روش ہے ،جو ہر سپاہی کا شیوہ ہے۔بقول ڈاکٹر سید عبداللہ ’’میرؔ کو زندگی سے بیزار شاعر نہیں کہا جاسکتا۔ اُن کا غم بعد میں آنے والے شاعر ، فانی کے غم سے مختلف ہے ،جس کی تان ہمیشہ موت پرٹوٹتی ہے۔ اُن کا غم سوداؔ سے بھی مختلف ہے‘‘۔میرؔ کہتے ہیں: خوش رہا جب تلک رہا جیتا میرؔ معلوم ہے قلندر تھا ………………… بہت آرزو تھی گلی کی تری سو یاں سے لہو میں نہا کر چلے ………………… حوصلہ شرطِ عشق ہے ورنہ بات کا کس کو ڈھب نہیں آتا میرؔ نے فنی خلوص کو پوری صداقت سے استعمال کیا ہے۔ فنی خلوص سے یہ مراد ہے کہ شاعر زندگی کے واقعات کو جس طرح دیکھتا ہے ، اسی طرح بیان کرے۔ میرؔ کا انداز اسی لیے مقبول ہے کہ اس میں صداقت اور خلوص او ر تمام باتیں بے تکلفی کے انداز میں کہی گئی ہیں۔ میرؔ نے خیال بند شاعر وں کی سی معنی آفرینی سے کام نہیں لیا۔ محض تخیل کے گھوڑ ے نہیں دوڑائے۔ اس کی وجہ یہ ہے کہ میرؔ عوام کا شاعر ہے۔ اس کے آس پاس کی زندگی سے درد و غم کے مضامین کے چشمے اُبل رہے تھے۔ میرؔ نے انھی مضامین کو سادہ الفاظ میں بے تکلف انداز میں پیش کیا۔ میرؔکے خلوص وصداقت کا اندازہ اُن کے اشعار سے بخوبی لگایا جاسکتا ہے: قدر رکھتی نہ تھی متاعِ دل سارے عالم کو میَں دکھا لایا دل مجھے اس گلی میں لے جا کر اور بھی خاک میں ملا لایا ابتدا ہی میں مر گئے سب یار عشق کی کون انتہا لایا میرؔ نے اپنے شیوۂ گفتار کو زیادہ موثر اور دلکش بنانے کے لیے تشبیہ و استعارے کا بڑے سلیقے سے استعمال کیا ہے۔یہ تشبیہات مردہ نہیں بل کہ اُن کے اندر زندگی دوڑتی ہوئی نظرآتی ہے۔ اس لیے کہ اُن کے خالق کے خون میں گرمی اور حرارت ہے اور وہ پوری صداقت اور پورے فنی خلوص سے اپنی زندگی بھر کے تجربات و تاثرات کو اُن تشبیہات و استعارات کی صورت میں پیش کررہا ہے۔ اُن میں کہیں بھی تصنع یا بناوٹ کا احساس نہیں ہوتا ہے: شام ہی سے بجھا سا رہتا ہے دل ہوا ہے چراغ، مفلس کا ………………… نازکی اس کے لب کی کیا کہیے پنکھڑی اک گلاب کی سی ہے ………………… کھلنا کم کم کلی نے سیکھا ہے اُس کی آنکھوں کی نیم خوابی سے میرؔ کی شاعری کے فکری عناصر میں متصوفانہ رنگ خاص طور پرقابل ذکر ہے۔جیسا کہ شروع میں ذکر کیا گیا کہ میرؔ کے والد صوفیانہ مزاج کے مالک تھے اور رات دن جذب و مستی کی کیفیات میں سرشار رہتے تھے۔ پھرمیر ؔبھلا کس طرح صوفیانہ تجربہ سے الگ رہ سکتے تھے۔ اُن کے ہاں تصوف کا تجربہ محض روایتی نہیں، یہ رسمی بھی نہیں، اس تجربے نے میر ؔکے ذھن و فکر کی تہذیب پر گہرے اثرات مرتسم کیے ہیں۔ وہ زندگی کو کسی عام انسان کی طرح نہیں دیکھتے ، اُن کی نظر صاف دل صوفی کی نظر ہے: موت اک ماندگی کا وقفہ ہے یعنی آگے چلیں گے دَم لے کر ………………… سرسری تم جہان سے گزرے ورنہ ہر جا جہانِ دیگر تھا میرؔ کو اس جہان ِ فانی سے گزرے دوسو برس سے زیادہ عرصہ بیت چکا تاہم اُن کی عظمت کااعتراف ہردَورمیںکیاجاتارہے گا۔بقول میرؔ: جانے کا نہیں شور سخن کا مرے ہرگز تا عمر جہاں میں مرا دیوان رہے گا میرؔ کی غزلوں کے 6 ضخیم دیوان ہزاروں اشعار پر مشتمل ہیں۔ مثنوی ، مسدس، مخمس ، رباعیات اور قطعات کے نمونے بھی وافر مقدارمیں ملتے ہیں۔اُردو کے اس خدائے سخن نے 20 ستمبر 1810ء میں لکھنو میں اس جہان سے کوچ کیا ۔ میرؔ ایک ایسے شاعر تھے ،جن کے فن کی ہر عہد پر غالب شاعرمرز اسداللہ خاں غالب ؔ سمیت کئی اساتذہ نے داد دی،بقول غالبؔ : ریختہ کے تمھیں اُستاد نہیں ہو غالبؔ کہتے ہیں اگلے زمانے میں کوئی میرؔ بھی تھا آخر میںاُستاد ابراہیم ذوقؔ کا شعرپیش ِ خدمت ہے: نہ ہوا پر نہ ہوا میرؔ کا انداز نصیب ذوقؔ یاروں نے بہت زور غزل میں مارا ٭…٭…٭ بشکریہ:سید کاظم جعفری ۔۔۔۔۔۔۔۔۔۔۔۔۔۔۔۔۔۔۔۔ منتخب اشعار ۔۔۔۔۔۔۔۔۔۔۔۔۔۔۔۔۔ آدم خاکی سے عالم کو جلا ہے ورنہ آئینہ تھا تو مگر قابل دیدار نہ تھا ۔۔۔۔۔۔۔۔۔۔۔۔۔۔۔۔۔۔ آگ تھے انتداۓ عشق میں ہم اب جو ہیں خاک انتہا ہے یہ ۔۔۔۔۔۔۔۔۔۔۔۔۔۔۔ آورگان عشق کا پوچھا جو میں نشاں مشت غبار لے کے صبا نے اڑا دیا ۔۔۔۔۔۔۔۔۔۔۔۔ اب جو اک حسرت جوانی ہے عمر رفتہ کی یہ نشانی ہے ۔۔۔۔۔۔۔۔۔۔۔۔۔۔ اب کر کے فراموش تو ناشاد کرو گے پر ہم جو نہ ہوں گے تو بہت یاد کرو گے ۔۔۔۔۔۔۔۔۔۔۔۔۔۔ اب تو جاتے ہیں بت کدے سے میرؔ پھر ملیں گے اگر خدا لایا ۔۔۔۔۔۔۔۔۔۔۔۔۔ بارے دنیا میں رہو غم زدہ یا شاد رہو ایسا کچھ کر کے چلو یاں کہ بہت یاد رہو ۔۔۔۔۔۔۔۔۔۔۔۔۔۔ بہت کچھ کہا ہے کرو میرؔ بس کہ اللہ بس اور باقی ہوس ۔۔۔۔۔۔۔۔۔۔۔۔ بے خودی لے گئی کہاں ہم کو دیر سے انتظار ہے اپنا ۔۔۔۔۔۔۔۔۔۔۔ بے وفائی پہ تیری جی ہے فدا قہر ہوتا جو باوفا ہوتا ۔۔۔۔۔۔۔۔۔۔۔۔۔۔۔ بلبل غزل سرائی آگے ہمارے مت کر سب ہم سے سیکھتے ہیں انداز گفتگو کا ۔۔۔۔۔۔۔۔۔۔۔۔۔۔ دے کے دل ہم جو ہو گۓ مجبور اس میں کیا اختیار ہے اپنا ۔۔۔۔۔۔۔۔۔۔۔۔۔ دیکھ تو دل کہ جاں سے اٹھتا ہے یہ دھواں سا کہاں سے اٹھتا ہے ۔۔۔۔۔۔۔۔۔۔۔۔۔ دل مجھ اس گلی میں لے جا کر اور بھی خاک میں ملا لایا ۔۔۔۔۔۔۔۔۔۔۔۔۔۔ دل سے رخصت ہوئی کوئی خواہش گریہ کچھ بے سبب نہیں آتا ۔۔۔۔۔۔۔۔۔۔۔۔۔۔ دل وہ نگر نہیں کہ پھر آباد ہو سکے پچھتاؤ گے سنو ہو یہ بستی اجاڑ کے ۔۔۔۔۔۔۔۔۔۔۔۔۔۔۔ دور بیٹھا غبار میرؔ اس سے عشق بن یہ ادب نہیں آتا ۔۔۔۔۔۔۔۔۔۔۔۔۔۔ گفتگو ریختے میں ہم سے نہ کر یہ ہماری زبان ہے پیارے ۔۔۔۔۔۔۔۔۔۔۔۔۔۔ ہم ہوۓ تم ہوۓ کہ میرؔ ہوۓ اس کی زلفوں کے سب اسیر ہوۓ ۔۔۔۔۔۔۔۔۔۔۔۔۔۔ ہم جانتے تو عشق نہ کرتے کسو کے ساتھ لے جاتے دل کو خاک میں اس آرزو کے ساتھ ۔۔۔۔۔۔۔۔۔۔۔۔۔ ہم خدا کے کبھی قائل ہی نہ تھے ان کو دیکھا تو خدا یاد آیا ۔۔۔۔۔۔۔۔۔۔۔۔۔۔ ہو گا کسی دیوار کے ساۓ میں پڑا میرؔ کیا کام محبت سے اس آرام طلب کو ۔۔۔۔۔۔۔۔۔۔۔۔۔ جب کہ پہلو سے یار اٹھتا ہے درد بے اختیار اٹھتا ہے ۔۔۔۔۔۔۔۔۔۔۔۔۔ کسو سے دل نہیں ملتا ہے یا رب ہوا تھا کس گھڑی ان سے جدا میں ۔۔۔۔۔۔۔۔۔۔۔۔۔۔ کیا کہیں کچھ کہا نہیں جاتا اب تو چپ بھی رہا نہیں جاتا ۔۔۔۔۔۔۔۔۔۔۔۔۔۔ لیتے ہی نام اس کا سوتے سے چونک اٹھے ہے خیر میرؔ صاحب کچھ تم نے خواب دیکھا ۔۔۔۔۔۔۔۔۔۔۔۔۔۔ میرؔ عمداۤ بھی کوئی مرتا ہے جان ہے تو جہان ہے پیارے ۔۔۔۔۔۔۔۔۔۔۔۔۔۔ میرؔ جی زرد ہوتے جاتے ہو کیا کہیں تم نے بھی کیا ہے عشق ۔۔۔۔۔۔۔۔۔۔۔۔۔۔۔ میرؔ صاحب زمانہ نازک ہے دونوں ہاتھوں سے تھامیے دستار ۔۔۔۔۔۔۔۔۔۔۔۔۔ سارے عالم پہ ہوں میں چھایا ہوا مستند ہے میرا فرمایا ہوا ۔۔۔۔۔۔۔۔۔۔۔۔ یوں اٹھے آہ اس گلی سے ہم جیسے کوئی جہاں سے اٹھتا ہے ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ مشہور ہیں دلوں کی مرے بےقراریاں جاتی ہیں لامکاں کو دلِ شب کی زاریاں چہرے پہ جیسے زخم ہےناخن کا ہر خراش اب دیدنی ہوئی ہیں مری دست کاریاں سو بار ہم نے گُل کے کہے پر چمن کے بیچ بھر دی ہیں آبِ‌ چشم سے راتوں کو کیاریاں کشتے کی اس کے خاک بھری جسمِ زار پر خالی نہیں ہیں لطف سے لوہو کی دھاریاں تُربت سے عاشقوں کی نہ اُٹھا، کبھو غبار جی سے گئے، ولے نہ گئیں رازداریاں اب کس کس اپنی خواہشِ مردہ کو روئیے تھیں ہم کو اُس سے سینکڑوں اُمّیدواریاں پڑھتے پھریں گے گلیوں میں ان ریختوں کو لوگ مدت رہیں گی یاد یہ باتیں ہماریاں کیا جانتے تھے ایسے دن آجائیں گے شتاب روتے گزرتیاں ہیں ہمیں راتیں ساریاں گل نے ہزار رنگِ سخن سر کیا ولے دل سے گئیں نہ باتیں تری پیاری پیاریاں جاؤ گے بھول عہد کو ، فر ہاد و قیس کے گر پہنچیں ہم شکستہ دلوں کی بھی باریاں بچ جاتا ، ایک رات جو کٹ جاتی اور میرؔ کاٹیں تھیں کوہ کن نے بہت راتیں بھاریاں