ستمبر 20 :-: معروف شاعرہ صفیہ شبنم ملیح آبادی کی برسی ہے

از: ابوالحسن علی بھٹکلی ----------------------------------------------------------- تاریخ پیدائش : 27 مارچ 1920 ء تاریخ وفات : 20 سپتمبر 2008 ء محترمہ صفیہ تخلص شمیم ۔۔۔۔۔۔۔ خواتین شعرا میں ایک نامور نام ۔ آپ کی ولادت 27 مارچ 1920 ء کو ملیح آباد میں ایسے گھرانے میں ہوئی جو معزز و مقتدر ہونے کے علاوہ نہایت باذوق گھرانا تسلیم کیا جاتا تھا ۔ جس میں شاعری کئی پشتوں سے چلی آ رہی تھی ۔ چنانچہ شمیم صاحبہ کے مورث اعلیٰ حسام الدولہ تہور جنگ نواب فقیر محمد خان گویا سے لیکر آپ کے پرنانا نواب محمد احمد خان احمد تعلقدار کسمنڈی اور نانا نواب بشیر احمد خان تعلقدار ملیح آباد تک کوئی بزرگ ایسا نہین ہے جو صاحبِ دیوان شاعر نہ ہو ۔ پھر سب سے آخر میں محترمہ کے حقیقی ماموں شاعرِ انقلاب حضرت جوش ملیح آبادی کے نام سے تو کون واقف نہیں ہے ۔ غرضیکہ اس خاندانی تعلق کی موجودگی میں شمیم صاحبہ کا شعری ذوق بجا طور پر موروثی کہلانے کا مستحق ہے ۔ صفیہ شمیم صاحبہ کا قیام عموما لکھنو میں رہا اور وہیں سے ابتدائی تعلیم حاصل کی ۔ اور اس کے بعد گھر پر علمی شوق پورا کرتی رھیں ۔ اور یہیں انہیں وہ ادبی صحبتیں نصیب ہوئیں جن کی بدولت ان کا فطری شاعرانہ مذاق پروان چڑھا ۔ تقسیم ہند کے بعد آپ اپنے شریک حیات کے ساتھ پاکستان تشریف لے آئیں ۔ اور راولپنڈی میں قیام پذیر ہوئیں ۔ آپ کا کلام مختلف ادبی رسائل " ماہِ نو ، ساقی ، مخزن اور ہمایوں وغیرہ میں اکثر شائع ہوتا رہا ۔ صفیہ شمیم صاحبہ نے دس سال کی عمر مین شعر کہنا شروع کیا ۔ وہ حضرت جوش ملیح آبادی کے رنگ سے خاصی متاثر تھیں ۔ محترمہ شمیم غزل ، نظم ، رباعی غرضیکہ ہر صنف میں طبع آزمائی کرتی رہیں ۔ آپ کے کلام میں رومانوی عنصر غالب ہے مناظر فطرت کی تصویرکشی میں آپ کو کمال حاصل تھا یہی وجہ ہے کہ اپنے دور میں ان کا مقام صف اول کی شاعرات میں کیا جاتا تھا ۔ آپ پاسبان کی نائب مدیرہ اور صبح نو کی مدیرہ بھی رہیں ۔ آپ کا انتقال راولپنڈی میں 20 ستمبر 2008  کو ہوا منتخب کلام ۔۔۔۔۔۔۔۔۔۔۔۔۔ گر ہے نئے نظام کی تخلیق کا خیال آبادیوں کو نذرِ بیاباں تو کیجئے گر جلوۂ جمال کی دل کو ہے آرزو اشکوں سے چشمِ شوق چراغاں تو کیجئے ہونا ہے دردِ عشق سے گر لذت آشنا دل کو خراب تلخئ ہجراں تو کیجئے اک لمحۂ نشاط کی گر ہے ہوس شمیم دل کو ہلاکِ حسرتِ ارماں تو کیجئے ۔۔۔۔۔۔۔۔۔ کر دیا بادِ خزاں نے خاک سارا گلستان لب ہلے ہی تھے کلی کے مسکرانے کیلئے ۔۔۔۔۔۔۔۔ اے ہمنشین نہ چھیڑ حکایتِ رنگ و بو مدت ھوئی کہ بھول چکے ہم بہار کو ۔۔۔۔۔۔۔۔۔۔ اک نگاہِ کرم کی حسرت میں زندگانی گذار دی ہم نے ۔۔۔۔۔۔۔۔۔۔۔ بے خبر منزلِ مقصود نہیں دور مگر عالمِ ہوش سے ہستی کو گذر جانے دے ۔۔۔۔۔۔۔۔۔۔ اللہ ری بے نیازئ آشفتگانِ شوق دامن بچا کے دیرو حرم سے گذر گئے ۔۔۔۔۔۔۔۔۔ وہ بھی دل پر گذر گیا عالم دل میں طوفانِ اشک ، لب پہ مہرِ سکوت ۔۔۔۔۔۔۔۔۔ بجھی بجھی سی سہی شمع زندگی لیکن ضمیرِ عشق میں سرمایۂ شرار ہیں ہم بایں کشا کش حرماں بایں غمِ دوراں کسی کے چشمِ کرم کے امیدوار ہیں ہم ۔۔۔۔۔۔۔۔۔۔۔ بہاریں آئیں بھی اور ھو گئیں رخصت مگر اب تک گلستان میں گلوں کی چاک دامانی نہیں جاتی کسی کا نام سن کر ضبط کے باوصف پہروں تک مرے بے نور چہرے کی درخشانی نہیں جاتی