ادھو ٹھاکرے پہنچے سپریم کورٹ، الیکشن کمیش کے فیصلے پر روک لگانے کا کیا مطالبہ

ادھو ٹھاکرے نے شیو سینا کا نام اور نشان شندے گروپ کو دینے کے الیکشن کمیشن کے حکم کو سپریم کورٹ میں چیلنج کیا ہے۔ یہی نہیں انہوں نے کمیشن کے حکم پر روک لگانے کا بھی مطالبہ کیا ہے۔ ادھو ٹھاکرے کی درخواست میں یہ بھی کہا گیا ہے کہ الیکشن کمیشن کا کردار منصفانہ نہیں رہا ہے۔ الیکشن کمیشن کا کام کرنے کا رویہ اس کے آئینی قد کے مطابق نہیں رہا۔ کمیشن نے نااہلی کی کارروائی کا سامنا کرنے والے ایم ایل اے کے دلائل کی بنیاد پر فیصلہ لے کر غلطی کی ہے۔ پارٹی میں ٹوٹ۔پھوٹ کے شواہد نہ ہونے پر کمیشن کا فیصلہ ناقص ہے۔ الیکشن کمیشن نے آئینی پیمانے پر اس معاملے کی تحقیقات نہیں کیں۔ ادھو ٹھاکرے نے یہ بھی دعویٰ کیا ہے کہ پارٹی کی تنظیم میں ان کے پاس اکثریت ہے۔ ادھو ٹھاکرے نے کہا، 'مجھ سے سب کچھ چھین لیا گیا۔ ہماری پارٹی کا نام اور نشان ہم سے چھین لیا گیا ہے لیکن ہم سے ٹھاکرے کا نام کوئی نہیں چھین سکتا۔ ہم نے الیکشن کمیشن کے فیصلے کے خلاف سپریم کورٹ سے رجوع کیا ہے، سماعت کل سے شروع ہوگی۔ انہوں نے کہا کہ اگر مہاراشٹر کے موجودہ حالات کو نہ سنبھالا گیا تو 2024 کے لوک سبھا انتخابات ملک کے آخری انتخابات ثابت ہوسکتے ہیں کیونکہ اس کے بعد یہاں انارکی شروع ہوجائے گی۔ انہوں نے کہا کہ میں نے الیکشن کمیشن سے درخواست کی تھی کہ سپریم کورٹ میں معطل ایم ایل ایز کا معاملہ ہے اور جب تک فیصلہ نہیں آتا اپنا فیصلہ نہ دیں۔