اڈپی سرکاری کالج کی طالبات نے کی  پریکٹیکل امتحانات کوملتوی کرنے کی درخواست

اڈپی : 24 فروری، 2022 (بھٹکلیس نیوز بیورو) اڈپی کے گورنمنٹ پری یونیورسٹی کالج فار ویمنزکی چھ طالبات نے ڈپٹی ڈائریکٹر سے یونیورسٹی میں پہلے سے طئے شدہ 28 فروری سے شروع ہونے والے اپنے پریکٹیکل امتحانات کو ملتوی کرنے کی اپیل کی ہے۔ ڈپٹی ڈائریکٹر کو دی اپنی درخواست میں طالبات نے کہا کہ وہ پچھلے دو مہینوں سے کلاسز میں شرکت نہیں کر سکے کیونکہ انھیں ہیڈ اسکارف پہن کر کلاس رومز میں داخلے سے منع کیا گیا اور پریکٹیکل امتحانات میں شرکت کے لیے مزید وقت درکار ہے۔ چھ درخواست گزاروں میں سے ایک اے ایچ الماس نے جمعرات کو اڈپی میں نامہ نگاروں کو بتایا کہ تمام چھ طالبات نے اڈپی ضلع کے پری یونیورسٹی ایجوکیشن کے ڈپٹی ڈائریکٹر سے درخواست کی ہے کہ وہ اپنے پریکٹیکل امتحانات کو ملتوی کرنے پر غور کریں۔ انہوں نے کہا کہ ڈی ڈی پی یو نے ہمیں بتایا کہ وہ اس درخواست کو پی یو بورڈ کے متعلقہ حکام تک پہنچائیں گے۔ حجاب کیس کی ایک اور درخواست گزار عالیہ اسدی نے کہا کہ حجاب پہننے کے معاملے کو سیاسی رنگ دینے کے بعد انہیں نامعلوم نمبروں سے دھمکی آمیز اور بدسلوکی والے فون کال موصول ہو رہے ہیں۔ انہوں نے کہا کہ حجاب کیس میں تمام درخواست گزار ہائی کورٹ کے حتمی فیصلے کا بے صبری سے انتظار کر رہے ہیں۔ انہوں نے کہا کہ جب تک عدالت کا فیصلہ نہیں آتا، حجاب پہنے بغیر پریکٹیکل امتحان میں شرکت کا سوال ہی پیدا نہیں ہوتا۔ بتادیں کہ اسکول و کالج میں حجاب کی اجازت کو لے کر عرضی گزاروں نے ہائی کورٹ کا رخ کیا تھا ۔ چیف جسٹس ریتو راج اوستھی کی صدارت والی فل بینچ کلاس کے اندر حجاب پہننے کی اجازت مانگنے والی لڑکیوں کی عرضیوں پر سماعت کررہی ہے ۔ چیف جسٹس نے کہا کہ ہم اس معاملہ کو اسی ہفتہ ختم کرنا چاہتے ہیں ۔ اس ہفتہ کے آخر تک اس معاملہ کو ختم کرنے کیلئے سبھی کوشش کریں ۔