شاہین باغ میں بلڈوزر روکنے سے متعلق سی پی آئی (ایم) کی عرضی خارج، سپریم کورٹ نے کہا- ہم صرف متاثرین کی بات سنیں گے، ہائی کورٹ جاؤ

نئی دہلی: شاہین باغ میں ایم سی ڈی کے ایکشن پر روک لگانے کے مطالبہ والی عرضی پر آج سپریم کورٹ میں سماعت ہوئی۔ جنوبی دہلی واقع شاہین باغ میں غیر قانونی تعمیرات کرکے بسائی گئیں بستیوں کو ہٹانے کے احکامات کے خلاف بھارتیہ کمیونسٹ پارٹی مارکسوادی یعنی سی پی ایم کی عرضی پر سپریم کورٹ نے سماعت کرنے سے انکار کردیا۔ سپریم کورٹ میں اس معاملے پر دو بجے سے سماعت شروع ہوئی، مگر سماعت شروع ہوتے ہی سپریم کورٹ نے ناراضگی ظاہر کی کہ آخر سیاسی جماعتیں اس عرضی کو لے کر کیوں آئی ہیں۔ سپریم کورٹ نے کہا کہ ہم صرف متاثرہ فریق کی بات سنیں گے۔ سپریم کورٹ نے سیاسی جماعت کو ہائی کورٹ جانے کا حکم دیا۔ واضح رہے کہ عرضی میں کہا گیا تھا کہ اتھارٹی جھگی بستیاں منہدم کرنے کا منصوبہ بنا چکے ہیں اور آئندہ ہفتے میں اس پر عمل ہونے والا ہے۔ عرضی میں یہ بھی ذکر ہے کہ اسی ہفتے چار مئی کو سنگم وہار میں غریبوں کی عمارتوں پر بلڈوزر چلایا گیا۔ اب پیر کے روز تک اوکھلا شاہین باغ میں بھی ایسا ہی کرنے کا اعلان کیا ہے۔