جنوبی افریقہ کے خلاف ون ڈے سیریز کیلئے ٹیم انڈیا کا اعلان، شیکھر دھون بنے کپتان

نئی د ہلی : ہندوستانی کرکٹ کنٹرول بورڈ نے جنوبی افریقہ کے خلاف ون ڈے سیریز کیلئے ہندوستانی ٹیم کا اعلان کردیا ہے ۔ شیکھر دھون کو کپتان بنایا گیا ہے جبکہ نائب کپتانی کی ذمہ داری شریس ایئر کے کندھوں پر ہوگی ۔ ٹیم میں دو وکٹ کیپر ایشان کشن اور سنجو سیمسن کو شامل کیا گیا ہے ۔ دیپک چاہر ، روی بشنوئی اور محمد سراج ون ڈے سیریز کیلئے ٹیم میں جگہ برقرار رکھنے میں کامیاب رہے ہیں ۔ ون ڈے سیریز کے بعد یہ تینوں ٹی ٹوینٹی ورلڈ کپ اسکواڈ سے آسٹریلیا میں جڑیں گے ۔ سنجو سیمسن کی بھی ون ڈے سیریز میں واپسی ہوئی ہے ۔ مکیش کمار اور رجت پاٹیدار پہلی مرتبہ ٹیم انڈیا میں جگہ بنانے میں کامیاب رہے ہیں ۔ تین میچوں کی سیریز کا پہلا ون ڈے میچ چھ اکتوبر کو کھیلا جائے گا جبکہ تیسرا اور آخری ون ڈے میچ گیارہ اکتوبر کو کھیلا جائے گا ۔ آخری ون ڈے کے چھ دن بعد ٹیم انڈیا ٹی ٹوینٹی ورلڈ کپ میں اپنا پہلا وارم اپ میچ کھیلے گی ۔ ہندوستانی ٹیم میزبان آسٹریلیا کے خلاف پریکٹس میچ کھیلے گی ۔ ہندوستانی ٹیم 10 اکتوبر کو آسٹریلیا روانہ ہوجائے گی ۔