بلی بائی  ایپ کیس میں اہم ملزمہ کو اتراکھنڈ سے حراست میں لیا گیا ،  بینگلورو سے گرفتار انجینئرنگ طالب علم سے تھی دوستی

ممبئی : 04 جنوری، 2022 (ایجنسی) ممبئی پولیس نے منگل کو کہا کہ فرضی آن لائن نیلامی میں مسلم خواتین کو نشانہ بنانے والی 'بلی بائی' ایپ کے معاملہ میں اہم ملزم کو اتراکھنڈ سے حراست میں لیا گیا ہے ۔ ملزم ایک خاتون ہے اور بنگلورو سے حراست میں لئے گئے 21 سالہ سول انجینئرنگ طالب علم کو جانتی تھی ، جس کو 10 گھنٹے کی پوچھ گچھ کے بعد ممبئی میں دن کے دوران گرفتار کیا گیا ۔ ایک دن پہلے بنگلورو سے حراست میں لئے گئے شخص کی شناخت وشال کمار کے طور پر ہوئی ہے ۔ ممبئی پولیس سائبر سیل کی ڈی سی پی رشمی کرندیکر نے 10 گھنٹے کی پوچھ گچھ کے بعد اس کو گرفتار کیا ۔ پولیس نے کہا کہ اہم ملزم 'بلی بائی' ایپ سے وابستہ تین اکاونٹس کو سنبھال رہا تھا ۔ نیوز ایجنسی اے این آئی نے ممبئی پولیس کے حوالے سے کہا کہ کمار نے Khalsa Supremacist کے نام سے ایک اکاونٹ کھولا ۔ 31 دسمبر کو اس نے دیگر اکاونٹس کے نام بدل کر سکھ ناموں سے ملتے جلتے نام رکھ دئے ۔ اس طرح سے فرضی خالصہ اکاونٹ ہولڈروں کو دکھایا گیا ۔ دراصل پنجابی لوگوں کے نام جان بوجھ کر رکھے گئے ، تاکہ ایجنسیوں کو لگے کہ یہ ایپ ڈیولپ کرنے والے پنجابی ہیں ۔ دہلی پولیس نے میزبان پلیٹ فارم 'گٹ ہب' کے ایپ پر 'نیلامی' کیلئے مسلم خواتین کی تصویریں اپ لوڈ کئے جانے کی شکایت ملنے کے بعد نامعلوم لوگوں کے خلاف یکم جنوری کی رات کو کیس درج کیا تھا ۔ ممبئی سائبر پولیس تھانہ نے بھی ایپ کو ڈیولپ کرنے والوں اور اس کی حوصلہ افزائی کرنے والے ٹویٹر ہینڈل کے خلاف بھی معاملہ درج کیا تھا ۔ غور طلب ہے کہ سیکڑوں مسلم خواتین کی اجازت کے بغیر ان کی تصویروں سے چھیڑ چھاڑ کرکے 'بلی بائی' ایپ پر 'نیلامی' کیلئے ڈال دیا گیا ۔ اس سے پہلے گزشتہ سال جولائی میں بھی دہلی پولیس کے سائبر سیل نے ایسا ایک معاملہ درج کیا تھا ۔ تب بھی ایک نامعلوم گروپ کے ذریعہ 'سللی ڈیلس' موبائل ایپ پر مسلم خواتین کی تصویریں شیئر کرنے کے بارے میں اس طرح کی شکایت درج کی گئی تھی ۔