ملک میں ایک ساتھ الیکشن کرانے کی عرضی دہلی ہائی کورٹ سے خارج، الیکشن کمیشن نے دیا یہ جواب

نئی دہلی : دہلی ہائی کورٹ نے مرکزی حکومت اور الیکشن کمیشن کو 2024 میں لوک سبھا اور اسمبلی انتخابات ایک ساتھ کرانے کی ہدایت دینے کا مطالبہ کرنے والی عرضی کو خارج کر دیا ہے۔ الیکشن کمیشن آف انڈیا (ای سی آئی) نے پیر کے روز کہا کہ یہ پارلیمنٹ کا کام ہے کہ وہ ملک میں بیک وقت انتخابات کرانے کے لئے آئین اور عوامی نمائندگی ایکٹ (آر پی آئی) میں ترمیم پر غور کرے۔ یہ دلیلیں دہلی ہائی کورٹ میں اس مفاد عامہ کی عرضی کی سماعت کے دوران سامنے آئیں، جس میں ای سی آئی کو الیکشن کے دوران ہونے والے فضول اخراجات کو بچانے کیلئے لوک سبھا اور ریاستی اسمبلیوں کے انتخابات ایک ساتھ کرانے کا مطالبہ کیا گیا تھا ۔ ای سی آئی کے وکیل سدھانت کمار نے کہا کہ اس معاملے کو دیکھنا پارلیمنٹ کا کام ہے۔ یہ پارلیمنٹ کا کام ہے کہ وہ ملک میں بیک وقت انتخابات کرانے کے لئے آئین اور آر پی آئی میں ترامیم پر غور کرے۔ ایڈوکیٹ سدھانت کمار نے ہفتہ، اتوار اور تعطیلات کے دن انتخابات کرانے کیلئے الیکشن کمیشن کو ہدایت دینے کا مطالبہ کرنے والی عرضی بھی اعتراض کیا اور کہا کہ سپریم کورٹ کی ایک آئینی بنچ نے پہلے ہی کہا ہے کہ الیکشن شیڈول ای سی آئی کی صوابدید پر ہے۔