کیا کرناٹک میں چل پائے گا وزیراعظم مودی اور وزیراعلی یوگی کا جادو؟ : چار مئی کو کارکنان کا جوش بڑھانے اڈپی پہنچ سکتے ہیں دونوں لیڈران
04:20PM Mon 17 Apr, 2023
بنگلورو: بی جے پی ذرائع سے خبریں آرہی ہیں کہ 4 مئی کو وزیراعظم مودی کرناٹک کے اڈوپی جا سکتے ہیں۔ اس دوران وزیر اعظم بھارتیہ جنتا پارٹی (بی جے پی) کے کارکنوں کی ایک کانفرنس میں شرکت کریں گے اور ان کے جوش و خروش میں اضافہ کریں گے۔ بتایا جا رہا ہے کہ وزیر اعظم کے ساتھ اتر پردیش کے وزیر اعلی یوگی آدتیہ ناتھ کے بھی آنے کی امید ہے۔ رپورٹ کے مطابق وزیر اعظم مودی کے دورے کے حوالے سے شہر میں ایک بڑا پروگرام منعقد کیا جائے گا۔
وزیر اعظم کا کرناٹک کے ساحلی ضلع اڈوپی کا دورہ انتخابات سے پہلے اہمیت کا حامل ہے۔ اڈوپی چکمگلور لوک سبھا سیٹ میں آٹھ اسمبلی سیٹیں ہیں، اڈوپی میں چار اور چکمگلور میں چار۔ 2018 کے اسمبلی انتخابات میں بی جے پی نے آٹھ میں سے سات سیٹیں جیتی تھیں۔
توقع ہے کہ وزیر اعظم نریندر مودی انتخابات سے پہلے کم از کم 15-20 ریلیوں سے خطاب کریں گے۔ بی جے پی کے ایک لیڈر نے اے این آئی کو بتایا کہ ہم امید کر رہے ہیں کہ وزیر اعظم مودی 10 مئی کو ہونے والے انتخابات سے پہلے کرناٹک میں 15-20 ریلیاں کریں گے۔
Photos
