’کورونا سے بچاؤ میں دونوں ویکسین محفوظ‘، لوک سبھا میں وزیر صحت کا بیان
03:51PM Fri 19 Mar, 2021
نئی دہلی: مرکزی حکومت نے آج واضح کیا کہ کورونا سے بچاؤ کے لیے دونوں ویکسین یعنی ٹیکے محفوظ ہیں اور اس حوالے سے کسی طرح کی کوئی کشمکش نہیں ہونی چاہیے۔ لوک سبھا میں جمعہ کے روز وقفہ سوال کے دوران ایک ضمنی سوال کے جواب میں صحت اور خاندانی بہبود کے مرکزی وزیر ڈاکٹر ہرش وردھن نے اپنے بیان میں کہا کہ ’’ویکسین کسی بھی بیماری سے بچاؤ اور ان سے ہونے والی اموات کو روکنے میں مدد کرتے ہیں۔ پوری دنیا میں کسی بھی ویکسین کو اجازت دیے جانے سے قبل اس کا سائنٹفک تجربہ ہوتا ہے۔ تجربے کے نتائج کی بیناد پر اسپیشل کمیٹی اس کا تجزیہ کرتی ہے۔‘‘
ڈاکٹر ہرش وردھن نے اپنی بات کو آگےبڑھاتے ہوئے یہ بھی کہا کہ ’’ ٹیکوں کو اجازت دینے میں عالمی ادارہ صحت (ڈبلیو ایچ او) جیسے عالمی تنظیم کا کردار ہوتا ہے۔ جب پوری دنیا کورونا کے ان ٹیکوں پر یقین کر رہی ہے اور حکومت اسے سب کے لیے مہیا کروا رہی ہے تو بھرم سے باہر آکر ہر کسی کو لینا چاہیے۔‘‘ وزیر صحت نے مزید کہا کہ ملک میں قومی صحت مہم کے تحت 12 سے زیادہ ٹیکے مفت میں بچوں کو دیے جا رہے ہیں اور ان ٹیکوں کی وجہ سے ہم نے چیچک اور پولیو جیسی بیماریوں سے نجات پائی ہے۔
Photos
