ڈبرو گڑھ جارہی انڈیگو فلائٹ کے انجن میں خرابی، گواہاٹی میں ایمرجنسی لینڈنگ، مرکزی وزیر سمیت 150 مسافر تھے سوار
04:10PM Sun 4 Jun, 2023
گواہاٹی : آسام میں گواہاٹی سے ڈبرو گڑھ جارہی انڈیگو کی فلائٹ کے انجن میں اتوار کی صبح اچانک سے خرابی آگئی ۔ ڈبرو گڑھ جارہی فلائٹ میں تکنیکی خرابی آنے کے بعد پائلٹ نے ایئرپورٹ افسران سے رابطہ کیا اور اس کے بعد واپس گوپی ناتھ بوردولوئی بین الاقوامی ایئرپورٹ پر ایمرجنسی لینڈنگ کرائی گئی ۔
موصولہ معلومات کے مطابق فلائٹ نمبر 6E2652 نے صبح تقریبا 8.40 بجے گواہاٹی سے اڑان بھری اور تقریبا 20 منٹ کے اندر واپس ایئرپورٹ پر لوٹ آئی ۔ اسی طیارہ میں پٹرولیم اور قدرتی گیس کے وزیر مملکت رامیشور تیلی اور بی جے پی کے دو ممبر اسمبلی پرشانت پھوکن اور تیرش گووال سمیت 150 سے زیادہ مسافر سفر کررہے تھے ۔
بتایا گیا کہ انڈیگو کے طیارہ نے گواہاٹی کے ایئرپورٹ سے ڈبرو گڑھ کیلئے ٹیک آف کیا تھا کہ پائلٹ نے طیارہ کے انجن میں خرابی کی جانکاری دی، جس کے بعد طیارہ کو گواہاٹی کے گوپی ناتھ بوردولوئی بین الاقوامی ہوائی اڈہ کی جانب موڑ دیا گیا ۔
مسافر طیارہ کے لینڈ ہونے کے بعد رامیشور تیلی نے کہا کہ وہ بی جے پی ممبر اسمبلی پرشانت پھوکن اور تیراش گووال کے ساتھ انڈیگو کی فلاٹ میں تھے ۔ طیارہ 15 سے 20 منٹ تک ہوا میں رہا اور پھر اس کو گواہاٹی کے ڈبروگڑھ ہوائی اڈہ کی جانب موڑ دیا گیا ۔ ہم سبھی محفوظ ہیں ۔
فلائٹ نمبر 6E2652 نے صبح تقریبا 8.40 بجے گواہاٹی سے اڑان بھری اور تقریبا 20 منٹ کے اندر واپس ایئرپورٹ لوٹ آئی ۔ طیارہ کے واپس لوٹنے کی وجہ سے تکنیکی خرابی بتائی جارہی ہے ۔ گواہاٹی میں اترنے کے فورا بعد طیارہ کے سبھی مسافروں کو اتار دیا گیا اور طیارہ کو معائنہ کیلئے بھیج دیا گیا ۔ حالانکہ اس معاملہ میں ابھی تک انڈیگو کی طرف سے کوئی ردعمل سامنے نہیں آیا ہے ۔
Photos
