سعودی عرب نے عمرہ کرنے والوں کو دی ایک اور خوشخبری:ختم ہوئی یہ پابندی

ریاض:26 اکتوبر، 2021 (ایجنسی)  سعودی عرب کی وزارت حج و عمرہ نے اعلان کیا ہے کہ ایک سے دوسرے عمرے کے درمیان 15 دن کے وقفے کی لازمی شرط کو اب ختم کیا جا رہا ہے۔ سعودی میڈیا کے مطابق عمرہ کے خواہش مند افراد کے لیے بڑا اقدام اُٹھایا گیا ہے۔ کورونا وبا کے دوران ایک بار عمرہ ادا کرنے کے بعد دوسرا عمرہ ادا کرنے کی اجازت 15 دن بعد دی جاتی تھی۔ اس کا مقصد کورونا پابندیوں پر عمل درآمد کرتے ہوئے زیادہ زیادہ افراد کو عمرہ ادا کرنے کی سہولت دینا تھا۔ 17 اکتوبر کو سعودی وزارت حج و عمرہ نے مسجد الحرام اور مسجد نبوی میں کورونا پابندیوں کے خاتمے کا اعلان کیا تھا۔ ڈیڑھ سال بعد  کورونا پابندیوں کے بغیر کندھے سے کندھا ملا کر باجماعت نماز ادا ہونا شروع ہوئیں اور نماز جمعہ میں روح پرور مناظر دیکھے گئے تھے۔ تاہم معتمرین پر ایک عمرے کے بعد دوسرا عمرہ کرنے کے لیے 15 دن وقفہ دینے کی پابندی عائد تھی لیکن اب یہ بھی پابندی اُٹھالی گئی ہے۔ اب معتمرین کو ہدایت کی گئی ہے اجازت نامے کی میعاد ختم ہوتے ہی نئے عمرے کا اجازت نامہ فوری طور پر حاصل کر لیا جائے۔