Lok Ayukta Police raids in Bhatkal: TMC chief caught red-handed accepting bribe

بھٹکل : 15 نومبر، 2024 (بھٹکلیس نیوز بیورو) بھٹکل میونسپال  چیف نیل کھنڈ   میستا کو مبینہ طور پر رشوت قبول کرتے ہوئے آج  جمعہ  کی صبح  لوک آیوکتہ پولس نے گرفتار کرلیا ہے ۔ کا روار سے آئے ہوئے لوک آیوکتہ کے ایس پی کمار چندرا نے بتایا کہ  ان کی  ٹیم نے آج بھٹکل میونسپال چیف کے دفتر پر چھاپہ مارا اور پچاس ہزار کی رشوت لیتے ہوئے چیف افسر کو رنگے ہاتھوں  گرفتار کرلیا ۔

لوک آیوکتہ کے ایس پی کمار چندرا نے اخبار نویسوں کو بتایا کہ بھٹکل کے ایک شخص نے اپنی نو تعمیر شدہ عمارت کا ٹیکس اور وقت  پر ٹیکس نہ دینے کے جرمانے کے طور پر دولاکھ روپئے میونسپال چیف کو ادا کیے تھے لیکن اس کے بدلے میں انہیں صرف نوے ہزار اڑسٹھ روپئے ( 90068) کی رسید جاری کی گئی  تھی اس کے باوجود ایک سال  کا عرصہ گزرنے کے بعد بھی ان کے گھر کے لیے  انڈر گراؤنڈ ڈرینج کے کنکشن کے لیے فارم نمبر ۳ نہیں دیا گیا تھا۔   جب ایک سال بعد  اس شخص  نے میونسپال چیف آفسر کے پاس  اس کی مانگ کی تو چیف نے مزید ایک لاکھ روپئے طلب کیے جن میں سے پچا س  ہزار فوری ادا کرنے کی مانگ کی ۔

اس تعلق سے اس شخص نے 14 نومبر کو  کاروار پہنچ کر لوک آیوکتہ کو شکایت کی جس کے بعد لوک آیوکتہ نے جال پچھاتے ہوئے آج میونسپال چیف افسر کو رشوت لیتے ہوئے  رنگے ہاتھوں گرفتار کر لیا ۔

ایس پی کے مطا بق چیف افسر کو قانونی اور طبی کارروائی  کے بعد عدالت میں پیش کیا جائے گا جس کے بعد اگلی کارروائی انجام دی جائے گی۔