’جامعہ ملیہ اسلامیہ کے ہاسٹلس کو دوبارہ کھولا جائے‘ سیکڑوں طلبہ نے کیا جم کر مظاہرہ اور وائس چانسلر نے کیا یہ اعلان

جامعہ ملیہ اسلامیہ کے سیکڑوں طلبہ نے کیمپس کے ہاسٹلس کھولنے کا مطالبہ کرتے ہوئے احتجاج کیا جو عالمی وبا کووڈ۔19 کی وجہ سے دو سال سے بند پڑے ہیں۔ احتجاج کے دوران طلبہ نے نعرے بلند کیے اور پلے کارڈز اٹھا رکھے تھے جن پر ہاسٹل دوبارہ کھولیں‘‘ اور ’’جامعہ انتظامیہ جاگ جائے‘‘ اور دیگر نعرہ درج تھے۔ طلبہ نے دعویٰ کیا کہ احتجاج دیر شام تک چلتا رہا، یہاں تک کہ بعد میں ایک نوٹس جاری کی گئی جس میں کہا گیا کہ جے ایم آئی کی وائس چانسلر پروفیسر نجمہ اختر نے طلبہ و طالبات کے لیے ہاسٹل کو دوبارہ کھولنے کی منظوری دے دی ہے۔ تیسرے سال کی طالبہ سویح انصاری نے کہا کہ تقریباً 500 تا 700 طلبہ نے احتجاج میں حصہ لیا۔ ہم دوپہر ایک بجے سے یہاں بیٹھے ہیں لیکن کوئی اہلکار باہر نہیں آیا۔