یوگی آدتیہ ناتھ کے ہیلی کاپٹر کی ایمرجنسی لینڈنگ، کوئی نقصان نہیں ہوا

وارانسی: یوپی کے وزیر اعلیٰ یوگی آدتیہ ناتھ کے ہیلی کاپٹر کی وارانسی میں ایمرجنسی لینڈنگ کرائی گئی ہے۔ رپورٹ کے مطابق یوگی آدتیہ ناتھ وارانسی میں ترقیاتی کاموں کا جائزہ لینے کے لئے گئے ہیں۔ آج صبح جب ہیلی کاپٹر نے پولیس لائن سے لکھنؤ کے لئے پرواز بھری تو 1500 فٹ کی بلندی پر جانے کے بعد اس کے شیشے سے کوئی پرندہ ٹکرا گیا۔ ہیلی کاپٹر کو فوری طور پر پولیس لائن میں اتار لیا گیا۔

وارانسی کے ضلع مجسٹریٹ نے اطلاع فراہم کرتے ہوئے بتایا کہ کسی طرح کا نقصان نہیں ہوا ہے اور ہیلی کاپٹر کو احتیاطاً اتارا گیا ہے۔ اس کے بعد وزیر اعلیٰ سڑک کے ذریعے بابت پور ایئرپورٹ کے لئے روانہ ہوئے۔ یہاں سے سرکاری طیارے نے لکھنؤ کے لئے پرواز بھری۔ خیال رہے کہ وزیر اعلیٰ یوگی آدتیہ ناتھ وارانسی کے دور روزہ دورے پر آئے ہوئے تھے اور آج لکھنؤ واپس لوٹ رہے تھے۔