میسور  میں زیر تعمیر مسجد نما بس اسٹاپ کو منہدم کرنے کی دھمکی:  احتجاج کے بعد زیر تعمیر ڈھانچے میں کی گئی تبدیلی

میسور: 15 نومبر، 2022 (ذرائع) ہندو کارکنان اور میسور سے بی جے پی کے رکن پارلیمنٹ کوڈاگو پرتاپ سمہا کی جانب سے دھمکی دیئے جانے کے بعد کرناٹک کے حکام نے شہر میں بس اسٹاپ کے اوپر بنائے جا رہے ڈھانچے میں تبدیلی کر دی ہے۔ رپورٹ کے مطابق، کارکنوں نے دعویٰ کیا تھا کہ بس اسٹاپ پر بنائے جا رہے گنبد کو مسجد کی شکل دی جا رہی ہے۔ اب اس میں تبدیلی کر کے گنبدوں پر کلش بھی بنا دیا گیا ہے۔ یہ  بس اسٹاپ میسو رکے کرشن راجا اسمبلی حلقہ انتخاب میں موجود ہے۔ رکن پارلیمنٹ نے گنبد جیسے ڈھانچے کو منہدم کرنے کے لئے چار دن کا وقت دیا تھا۔ انہوں نے کہا تھا کہ اگر ان گنبدوں کو نہیں توڑا گیا تو وہ خود ہی جے سی بی کی مدد سے اسے مسمار کر دیں گے۔ قبل ازیں، کوڈاگو پرتاپ سمہا نے کہا تھا ’’میں نے اسے (بس اسٹینڈ) سوشل میڈیا پر دیکھا ہے۔ اس بس اسٹینڈ کی دو گنبدیں ہیں۔ درمیان میں ایک بڑی اور اس کے بازو میں دو چھوٹی گنبد ہے۔ یہ مسجد ہی ہے میں نے انجینئرس سے کہا ہے 3-4 دن کا وقت ہے۔ اگر ایسا نہ کیا گیا تو میں خود جے سی بی لاکر اسے منہدم کردوں گا۔‘‘