پرشانت بھوشن کا سپریم کورٹ سے معافی مانگنے سے انکار، بولے۔ دکھاوے کی معافی میرے ضمیر کی توہین ہوگی

نئی دہلی۔ توہین عدالت کیس میں وکیل پرشانت بھوشن (Prashant Bhushan) نے پیر کے روز سپریم کورٹ (Supreme Court) میں ایک نیا حلف نامہ داخل کیا ہے۔ انہوں نے معاملہ میں معافی مانگنے سے انکار کر دیا ہے۔ انہوں نے صفائی میں کہا کہ ان کی طرف سے کیا گیا ٹویٹ عدالت اور آئین کے تحفظ کے لئے تھا۔ پرشانت بھوشن نے کہا کہ وہ ان کا نظریہ تھا اور وہ اس پر قائم ہیں۔ پرشانت بھوشن نے سہریم کورٹ سے کہا کہ اپنے خیالات ظاہرکرنے پر شرط یا بغیر کسی شرط کے معافی مانگنا ٹھیک نہیں ہو گا۔ انہوں نے کہا کہ دکھاوے کی معافی مانگنا میرے ضمیر کی اور ایک ادارے کی توہین کے برابر ہو گا۔ بتا دیں کہ سپریم کورٹ کی توہین کے معاملے میں منگل کو سماعت ہونی ہے۔ پچھلی سماعت میں عدالت نے بھوشن کو دو دن سوچنے کا وقت دیا تھا کہ اگر وہ اپنے ٹویٹ پر دوبارہ غور کرنا چاہتے ہیں تو کر لیں۔