ہندوستان کی 'اقلیت مخالف' شبیہ تشویشناک، گھریلو کمپنیوں کو اٹھانا پڑ سکتا ہے نقصان! رگھورام کا انتباہ
11:37AM Fri 22 Apr, 2022
نئی دہلی: ہندوستان کی متعدد ریاستوں میں ہونے والے فرقہ وارانہ تشدد کے درمیان ریزرو بینک آف انڈیا (آر بی آئی) کے سابق گورنر رگھورام راجن نے ملک کو خبردار کیا ہے۔ رگھورام نے کہا کہ دنیا میں ملک کی بن رہی اقلت مخالف شبیہ ہندوستانی مصنوعات کے بازار کو نقصان پہنچا سکتی ہے۔
رگھورام راجن نے کہا کہ ہندوستان کی اقلیت مخالف شبیہ کا نقصان یہ ہوگا کہ اس کے سبب غیر ملکی حکومتیں ہندوستان پر اعتماد کرنے میں ہچکچا سکتی ہیں۔ ہو سکتا ہے کہ سرمایہ دار آپ کو ایک قابل اعتماد شراکت دار کے طور پر نہ دیکھے۔ آر بی آئی کے سابق گورنر نے یہ بیان جمعرات کے دن دیا، جبکہ اس سے ایک روز قبل یعنی بدھ کے روز دہلی کے جہانگیر پوری علاقہ میں فرقہ وارانہ تشدد کے بعد تجاوزات مخالف مہم کے نام پر مسجد کے پاس بلڈوزر چلا کر کئی تعمیرات کو منہدم کر دیا گیا تھا۔
ایک میڈیا نیٹورک سے بات کرتے ہوئے آر بی آئی کے سابق گورنر نے کہا کہ جمہوریت ہمیشہ آسان نہیں ہوتی اور اسے لگاتار راہ دکھانے کی ضرورت ہوتی ہے۔ جمہوریت میں وقتاً فوقتاً تمام فریقین سے بات چیت کرنے اور حسب ضرورت تبدیلی کرنے کا کام کرنا پڑتا ہے۔ انہوں نے روس اور چین کی مثال پیش کرتے ہوئے کہا کہ ان ممالک میں چیک اور بیلنس نہیں ہونے کے سب انہیں کافی نقصان اٹھانا پڑتا ہے۔
اقلیتوں کے معاملے پر رگھورام راجن نے کہا، ’’اقلیتوں کے ساتھ ناروا سلوک پوری دنیا میں ایک بری تصویر پیش کرتا ہے، اور سرمایہ کار آپ کو ایک قابل اعتماد شراکت دار کے طور پر دیکھنا بند بھی کر سکتے ہیں۔‘‘
Photos
