کرناٹک کے انتخابی نتائج سے بدحواس بی جے پی نے سبھی اراکین پارلیمنٹ کا رپورٹ کارڈ طلب کیا

اس درمیان بی جے پی ذرائع سے مل رہی خبروں میں بتایا جا رہا ہے کہ پارٹی اس بات کا گہرائی سے جائزہ لے رہی ہے کہ کرناٹک میں ہوئی شکست کا آئندہ لوک سبھا انتخاب پر کیا اثر پڑ سکتا ہے۔ اس بات کا بھی جائزہ لیا جا رہا ہے کہ رواں سال ہونے والے راجستھان، مدھیہ پردیش، چھتیس گڑھ اور تلنگانہ کے اسمبلی انتخابات پر اس کا کیا اثر پڑے گا۔ پارٹی چھتیس گڑھ اور مدھیہ پردیش کو لے کر زیادہ فکر مند ہے کیونکہ چھتیس گڑھ میں کانگریس حکومت نے عوام میں اپنی اچھی پکڑ بنا لی ہے۔ دوسری طرف مدھیہ پردیش میں شیوراج چوہان کے خلاف لوگوں کا غصہ بار بار ابھر کر سامنے آتا رہا ہے۔ ویسے بھی گزشتہ مرتبہ کانگریس نے مدھیہ پردیش میں حکومت تشکیل دی تھی، لیکن سیاسی کھیل کرتے ہوئے شیوراج ایک بار پھر وزیر اعلیٰ بننے میں کامیاب ہو گئے تھے۔