وزیر اعظم مودی نے نئے پارلیمنٹ ہاؤس کا سنگ بنیاد رکھا، کہا۔ آج کا دن تاریخی ہے

نئی دہلی۔ وزیر اعظم نریندر مودی نے آج نئے پارلیمنٹ ہاؤس کا سنگ بنیاد رکھا۔ نریندر مودی نے اس تاریخی موقع پر منعقدہ ایک تقریب میں بھومی پوجن کے بعد ایک بج کر 11 منٹ پر نئے پارلیمنٹ ہاؤس کا سنگ بنیاد رکھا۔ اس موقع پر لوک سبھا کے اسپیکر اوم برلا، مرکزی کابینہ کے متعدد سینئر ممبران اور ممبران پارلیمنٹ کی بڑی تعداد موجود تھی۔ پارلیمنٹ کی نئی عمارت کا سنگِ بنیاد رکھنے کے بعد وزیر اعظم نریندر مودی نے اپنے خطاب میں کہا کہ آج کا دن تاریخی ہے اور یہ سنگِ میل ثابت ہو گا۔ انہوں نے کہا کہ ملک میں اب ہندستانی خیالات کے ساتھ نئی پارلیمنٹ تعمیر ہونے جا رہی ہے، ہم سب ملک کے باشندگان اسے تعمیر کریں گے۔ انہوں نے کہا کہ ملک جب 75 واں یوم آزادی منائے گا تو یہ عمارت ہماری حوصلہ افزائی کرے گی۔ وزیر اعظم نے کہا کہ ' پالیسی میں فرق ہو سکتا ہے، سیاست میں اختلاف ہو سکتا ہے لیکن ہم عوام کی خدمت کے لئے ہیں۔ اس آخری ہدف میں کوئی اختلاف نہیں ہونا چاہئے۔ بحث ومباحثہ پارلیمنٹ کے اندر ہو یا پارلیمنٹ کے باہر، قوم کی خدمت کا عزم، قومی مفاد کے تئیں خودسپردگی مسلسل نظر آنی چاہئے'۔ پارلیمنٹ کی نئی عمارت کی تعمیر کا کام 2022 تک مکمل ہونا ہے۔ ملک کی آزادی کے 75 ویں سال میں نئی عمارت میں اجلاس شروع ہوگا۔ پارلیمنٹ کی نئی عمارت جدید ٹیکنالوجی سے آراستہ ہوگی۔ اس میں حفاظت کے لئے جدید ترین آلات لگے ہوں گے۔ نیز ، مستقبل کے مدنظر لوک سبھا اور راجیہ سبھا چیمبروں میں ممبروں کے لئے نشستوں کی تعداد میں بھی اضافہ کیا جائے گا۔ یو این آئی، اردو کے ان پٹ کے ساتھ